சென்னை, 19 செப்டம்பர் (ஹி.ச.)

த.வெ.க அரசு உண்மையில் யாருடைய நலனைப் பாதுகாக்கிறது என

திமுக முன்னாள் அமைச்சர் டி.ஆர்.பி. ராஜா தனது எக்ஸ் தளப் பதிவில் கூறியுள்ளார்,

2021 ஆம் ஆண்டு முதல், முதலமைச்சர் மு.க.ஸ்டாலின் தலைமையிலான திராவிட மாடல் அரசு, தமிழ்நாட்டு மக்களின் பணத்தில் வாங்கப்பட்ட சொத்துகளை இந்திய விமான நிலைய ஆணையத்திடமோ (AAI) அல்லது தனியார் நிறுவனங்களிடமோ ஒப்படைக்கக் கூடாது என்பதில் உறுதியாக இருந்து வருகிறது.

தமிழ்நாடு மக்களின் உரிமையைப் பாதுகாப்பதற்காகவும், மக்களின் வரிப்பணத்தில் செலவிடப்படும் ஒவ்வொரு ரூபாய்க்கும் தமிழ்நாட்டுக்கு உரிய வருவாய் கிடைப்பதை உறுதி செய்வதற்காகவும் திமுக அரசு தொடர்ந்து போராடியது.

அதனால்தான், பரந்தூர் விமான நிலையத் திட்டம் பொது-தனியார் கூட்டாண்மை முறையில் அமைக்கப்பட்டு, அதன் மீதான அரசின் உரிமை பாதுகாக்கப்படும் வகையில் திட்டமிடப்பட்டது.

தமிழ்நாட்டு வரி செலுத்துவோரின் பணத்தில் கையகப்படுத்தப்பட்ட நிலத்தில் அமைக்கப்படும் விமான நிலையத்தின் முழுமையான கட்டுப்பாட்டையும் எந்தவொரு தனியார் நிறுவனமும் பெற முடியாத வகையில் இந்தத் திட்டம் வடிவமைக்கப்பட்டது.

ஆனால், இன்று TVK அரசு, தமிழ்நாட்டுக்குச் சொந்தமான எதிர்காலத் தேவைகளுக்கு ஏற்ற பரந்தூர் விமான நிலையத் திட்டத்தையே ரத்து செய்துவிட்டு, சென்னை விமான நிலையத்தை ஒரு தனியார் நிறுவனத்திடம் தாரை வார்க்க முயற்சித்து வருகிறது!

திமுக ஆட்சியில் தமிழ்நாட்டுக்கு வருவாய் ஈட்டித் தரக்கூடிய விமான நிலையத்தை உருவாக்கும் பணிகள் முன்னெடுக்கப்பட்டன.

ஆனால், தற்போது TVK அரசு அந்தத் திட்டத்தை ரத்து செய்து, அதற்குப் பதிலாக ஒரு தனியார் நிறுவனத்தின் ஏகபோகத்தை வளர்க்க முயற்சிக்கிறது.

TVK அரசு உண்மையில் யாருடைய நலனைப் பாதுகாக்கிறது? என்று பதிவிட்டுள்ளார்.

Hindusthan Samachar / ANANDHAN