சென்னை, 19 செப்டம்பர் (ஹி.ச.)

காவிரியில் இருந்து தமிழகத்திற்கு திறந்து விடப்படும் நீரை கர்நாடக மாநில அரசு முற்றிலுமாக நிறுத்தி உள்ளது.

கடந்த ஐந்து நாட்களாக படிப்படியாக நீரின் அளவை குறைத்து வந்த நிலையில், இன்று முதல் ஒரு சொட்டு நீர் கூட திறக்கப்படவில்லை என்பது தமிழக விவசாயிகள் மத்தியில் பெரும் கொதிப்பையும் கவலையையும் ஏற்படுத்தியுள்ளது.

கர்நாடகா மாநிலத்தில் உள்ள கிருஷ்ணராஜ சாகர் அணையில் இருந்து காவிரி ஆற்றுக்கு நீர் திறப்பது தொடர்ந்து நிறுத்தப்பட்டுள்ளதாக தகவல்கள் வெளியாகியுள்ளன.

காவிரி நீர் மேலாண்மை ஆணையத்தின் உத்தரவுகளை மீறி கர்நாடக அரசு இந்த முடிவை எடுத்துள்ளதாக குற்றச்சாட்டு எழுந்துள்ளது.

பெங்களூரு குடிநீர் தேவை மற்றும் அணைகளில் நீர் இருப்பு குறைவு என்ற காரணத்தை கர்நாடக தரப்பு தொடர்ந்து முன்வைத்து வருகிறது.

இந்த திடீர் நிறுத்தத்தால் தமிழகத்தில் குறுவை சாகுபடி கடுமையாக பாதிக்கப்படும் அபாயம் ஏற்பட்டுள்ளது.

மேட்டூர் அணைக்கு வரும் நீர்வரத்து வெகுவாக குறைந்துள்ளதால், டெல்டா மாவட்டங்களில் பயிர்கள் கருகும் நிலை உருவாகியுள்ளது.

இந்த விவகாரத்தில் தமிழகத்திற்கு ஒரு நிச்சயமற்ற தன்மை ஏற்பட்டுள்ளதால், தமிழக அரசு உச்ச நீதிமன்றத்தில் அவசர மனு தாக்கல் செய்துள்ளது.

காவிரி மேலாண்மை ஆணையத்தின் உத்தரவுகளை கர்நாடகா பின்பற்றுவதை உறுதி செய்ய வேண்டும் என தமிழகம் வலியுறுத்தி வருகிறது.

Hindusthan Samachar / vidya.b