சென்னை, 02 செப்டம்பர் (ஹி.ச.)

தமிழக சட்டப்பேரவை கூட்டத் தொடரில் இன்று மிக முக்கியமான மானியக் கோரிக்கைகள் மீதான விவாதம் நடைபெறுகிறது. இன்று காலை கேள்வி நேரம் முடிந்தவுடன் கால்நடை பராமரிப்புத் துறையின் மானியக் கோரிக்கை மீதான விவாதம் தொடங்குகிறது.

இதனைத் தொடர்ந்து பால்வளத் துறை மற்றும் மீன்வளம் மற்றும் மீனவர் நலத்துறை ஆகிய துறைகளின் மானியக் கோரிக்கைகள் மீதும் விரிவான விவாதம் நடைபெற உள்ளது.

தமிழகத்தின் கிராமப்புற பொருளாதாரத்தின் முதுகெலும்பாக விளங்கும் பால்வளம் மற்றும் கால்நடைத் துறைகள் தொடர்பான இந்த விவாதத்தில் ஆளும் மற்றும் எதிர்க்கட்சி உறுப்பினர்கள் தீவிரமாக பங்கேற்க உள்ளனர்.

குறிப்பாக எதிர்க்கட்சியான திமுக சார்பில் முன்னாள் அமைச்சர்கள் அனிதா ராதாகிருஷ்ணன், ராஜா கண்ணப்பன் உள்ளிட்ட மூத்த உறுப்பினர்கள் இந்த விவாதத்தில் பங்கேற்று பேச உள்ளனர்.

அவர்கள் தங்கள் ஆட்சிக் காலத்தில் கொண்டுவரப்பட்ட திட்டங்கள், பால் உற்பத்தியாளர்களுக்கு வழங்கப்பட்ட ஊக்கத்தொகை, மீனவர்களுக்கான நலத்திட்டங்கள் குறித்து எடுத்துரைப்பதோடு, தற்போதைய அரசின் நிதி ஒதுக்கீடு குறித்தும் கேள்விகளை எழுப்புவார்கள் என எதிர்பார்க்கப்படுகிறது.

இதேபோல் மீனவர் நலன் தொடர்பான விவாதத்தின் போது, மீன்பிடி தடைக்கால நிவாரணம், மீனவர்களுக்கான வீட்டு வசதி, ஆழ்கடல் மீன்பிடிப்புக்கான மானியம் உள்ளிட்ட பிரச்சினைகள் குறித்து உறுப்பினர்கள் பேசுவார்கள் என தெரிகிறது.

உறுப்பினர்களின் அனைத்து கேள்விகளுக்கும், விவாதங்களுக்கும் அரசு தரப்பில் அமைச்சர்கள் விஜயலட்சுமி, கமலி மற்றும் ஸ்ரீநாத் ஆகியோர் விரிவான பதிலளிக்க உள்ளனர்.

கால்நடைகளுக்கான காப்பீட்டு திட்டம், கறவை மாடுகள் வழங்கும் திட்டம், பால் கொள்முதல் விலை உயர்வு மற்றும் ஆவின் நிறுவனத்தை நவீனப்படுத்துதல் குறித்த புதிய அறிவிப்புகளை அவர்கள் வெளியிடுவார்கள் என்றும், மீனவர்களின் வாழ்வாதாரத்தை மேம்படுத்துவதற்கான புதிய திட்டங்களை அறிவிப்பார்கள் என்றும் எதிர்பார்க்கப்படுகிறது.

Hindusthan Samachar / vidya.b