மும்பை, 02 செப்டம்பர் (ஹி.ச.)

மறைந்த பாலிவுட் நடிகர் சுஷாந்த் சிங் ராஜ்புத்தின் முன்னாள் மேலாளர் திஷா சாலியன் கடந்த 2020 ஜூன் 8-ஆம் தேதி, மும்பை மலாட் பகுதியில் உள்ள குடியிருப்பின் 14-வது மாடியில் இருந்து கீழே விழுந்து உயிரிழந்தார்.

இதற்கு ஐந்து நாட்களுக்குப் பிறகு, நடிகர் சுஷாந்த் சிங் ராஜ்புத் மும்பை பாந்த்ராவில் உள்ள தனது வீட்டில் உயிரிழந்தார். இரு மரணங்களும் அடுத்தடுத்து நிகழ்ந்ததால், திஷாவின் மரணம் குறித்து பல்வேறு சந்தேகங்களும் விவாதங்களும் எழுந்தன.

திஷா மரணம் தொடர்பாக அப்போது மும்பை போலீசார் எதிர்பாராத மரண அறிக்கை (ADR) பதிவு செய்து விசாரணை நடத்தினர். பின்னர் போலீஸ் விசாரணையில் இது தற்கொலை எனக் கூறப்பட்டது. ஆனால், திஷாவின் தந்தை சதீஷ் சாலியன், தனது மகள் தற்கொலை செய்யவில்லை என்றும், அவர் கொலை செய்யப்பட்டிருக்கலாம் என்றும் குற்றம்சாட்டி, விசாரணையில் போலீசார் முறையாக செயல்படவில்லை எனக் கூறி உயர் நீதிமன்றத்தை அணுகினார்.

இந்த வழக்கின் விசாரணையின்போது, வழக்கமான குற்ற வழக்காக FIR பதிவு செய்யாமல் பல ஆண்டுகளாக ADR விசாரணை மட்டுமே நடத்தப்பட்டதன் அவசியம் என்ன? என நீதிமன்றம் கேள்வி எழுப்பியது. பல ஆண்டுகளாக நடைபெற்ற விசாரணையின் சட்டப்பூர்வ பயன் குறித்தும் நீதிமன்றம் கேள்வி எழுப்பியிருந்தது.

மேலும், திஷாவின் தந்தை சந்தேகம் எழுப்பியிருந்த நிலையில், FIR பதிவு செய்வதற்கு என்ன தடையாக இருந்தது என்றும் நீதிமன்றம் முன்பு கேள்வி எழுப்பியது. திஷாவின் பிரேதப் பரிசோதனை அறிக்கை மற்றும் ADR அறிக்கையின் நகல்கள் ஏன் அவரது குடும்பத்தினருக்கு பல ஆண்டுகளாக வழங்கப்படவில்லை என்றும் நீதிமன்றம் கேள்வி எழுப்பியது.

இந்நிலையில், நீதிபதிகள் சரங் கோட்வால் மற்றும் ரஞ்சித்சின்ஹா ராஜா போன்ஸ்லே அடங்கிய அமர்வு, மும்பை போலீசிடம் உள்ள வழக்கு தொடர்பான அனைத்து ஆவணங்களையும் சிபிஐயிடம் ஒப்படைக்க உத்தரவிட்டுள்ளது. சிபிஐ FIR பதிவு செய்து, திஷாவின் மரணத்துக்கான உண்மையான காரணம் மற்றும் அதைச் சுற்றியுள்ள அனைத்து சூழ்நிலைகளையும் விசாரிக்க வேண்டும் என உத்தரவிடப்பட்டுள்ளது.

அதே நேரத்தில், விசாரணையில் போதுமான ஆதாரங்கள் கிடைக்கும் வரை யாரையும் குற்றவாளியாகக் கருதக்கூடாது என்றும் உயர் நீதிமன்றம் தெளிவுபடுத்தியுள்ளது.

எனவே, சிபிஐ விசாரணை உத்தரவு என்பது யாரேனும் குற்றம் செய்ததாக நீதிமன்றம் முடிவு செய்துவிட்டது என்பதல்ல, மாறாக, இதுவரை எழுந்துள்ள சந்தேகங்கள் மற்றும் விசாரணையில் உள்ள குறைபாடுகளைத் தெளிவுபடுத்துவதற்கான முழுமையான குற்றவியல் விசாரணைக்கு வழிவகுக்கும் நடவடிக்கையாகும்.

Hindusthan Samachar / VINOTH KUMAR P