ஹைதராபாத், 21 செப்டம்பர் (ஹி.ச)

ஹைதராபாத் மூசாப்பேட்டை, ஆஞ்சநேயா நகரில் உள்ள மூன்று மாடி கட்டிடம் ஒன்றின் இரண்டாவது மாடியில் கிரில் கதவு பொருத்தப்பட்ட பழைய லிஃப்ட்டில் இருந்து முரளி என்ற நபர் இன்று காலை வெளியே வர முயன்றுள்ளார்.

அப்போது லிஃப்ட்டின் சென்சார் பழுது காரணமாக, யாரோ ஒருவர் மூன்றாவது மாடிக்கான பொத்தானை அழுத்தியதும் லிஃப்ட் திடீரென மேல்நோக்கி நகர்ந்தது. இதனால் முரளியின் ஒரு கால் லிஃப்ட் கிரில்லில் சிக்கிக்கொள்ள, மற்றொரு கால் இரண்டாவது மாடியின் தளத்தில் இருந்ததால், இரண்டாவது மற்றும் மூன்றாவது மாடிகளுக்கு இடையே அவர் தொங்கிய நிலையில் சிக்கிக்கொண்டார்.

லிஃப்ட்டுக்குள் இருந்த முரளியின் மனைவி கூச்சலிட்டு உதவி கேட்டுள்ளார். குடியிருப்புவாசிகள் அவரை மீட்க முயன்றும் முடியாததால், ஹைதராபாத் பேரிடர் மீட்பு மற்றும் சொத்து பாதுகாப்பு நிறுவனமான ஹைட்ரா (HYDRAA) கட்டுப்பாட்டு அறைக்கு தகவல் தெரிவித்தனர்.

கூகட்பள்ளி அருகே நிலைநிறுத்தப்பட்டிருந்த ஹைட்ரா பேரிடர் மீட்புப் படையினர் உடனடியாக சம்பவ இடத்திற்கு விரைந்து மீட்பு பணியை தொடங்கினர்.

முரளியை மீட்பதற்காக லிஃப்ட் சுவரின் ஒரு பகுதியை உடைக்க வேண்டியிருந்தது என்று ஹைட்ரா அதிகாரி ஜே.டி.வி பிரசாத் தெரிவித்தார். சனத்நகர் தீயணைப்புத் துறையினரும் இணைந்து ஹைட்ராலிக் கட்டர் மூலம் மீட்பு பணியில் உதவினர்.

சுமார் 90 நிமிட போராட்டத்திற்குப் பிறகு காலை 10.50 மணியளவில் முரளி மீட்கப்பட்டு அருகிலுள்ள மருத்துவமனைக்கு கொண்டு செல்லப்பட்டார். மருத்துவ பரிசோதனையில், லிஃப்ட்டுக்கும் சுவருக்கும் இடையே நசுங்கியதில் அவரது காலில் எலும்பு முறிவு ஏற்பட்டிருப்பது தெரியவந்தது. இதற்காக அவர் தற்போது சிகிச்சை எடுத்து வருகின்றார்.

Hindusthan Samachar / vidya.b