தென்கொரியா, 21 செப்டம்பர் (ஹி.ச.)

தென்கொரிய அதிபர் லீ ஜே மியுங், ஐக்கிய நாடுகள் சபையின் பொதுச் சபைக் கூட்டத்தில் பங்கேற்பதற்காகவும், மெக்சிகோவுடனான இருதரப்பு உறவுகளை வலுப்படுத்துவதற்காகவும் வரும் செப்டம்பர் 21 முதல் 27-ம் தேதி வரை அமெரிக்கா மற்றும் மெக்சிகோவுக்கு அரசுமுறைப் பயணம் மேற்கொள்ள உள்ளார். இந்தத் தகவலை தென்கொரிய அதிபர் மாளிகையான புளூ ஹவுஸ் இன்று அதிகாரப்பூர்வமாக அறிவித்துள்ளது.

அதிபரின் இந்தப் பயணத்தில் முதன்மையான நிகழ்வாக நியூயார்க்கில் நடைபெறும் ஐ.நா. பொதுச்சபைக் கூட்டத்தில் அவர் உரையாற்ற உள்ளார்.

உலகளாவிய பாதுகாப்பு, காலநிலை மாற்றம், கொரிய தீபகற்பத்தில் அமைதி மற்றும் பொருளாதார ஒத்துழைப்பு உள்ளிட்ட முக்கிய விவகாரங்கள் குறித்து அவர் தனது நிலைப்பாட்டை முன்வைப்பார் என எதிர்பார்க்கப்படுகிறது.

ஐ.நா. கூட்டத்தைத் தொடர்ந்து, அதிபர் லீ ஜே மியுங் மெக்சிகோவுக்குச் செல்ல உள்ளார். அங்கு மெக்சிகோ அதிபர் கிளாடியா ஷீன்பாமுடன் அவர் உச்சி மாநாட்டு பேச்சுவார்த்தை நடத்துகிறார். இந்த சந்திப்பின் போது இரு நாடுகளுக்கு இடையேயான வர்த்தகம், முதலீடு, தொழில்நுட்பம் மற்றும் விநியோகச் சங்கிலி ஒத்துழைப்பை மேம்படுத்துவது குறித்து விரிவாக விவாதிக்கப்படும் எனத் தெரிகிறது. லத்தீன் அமெரிக்காவில் தென்கொரியாவின் முக்கிய பொருளாதாரக் கூட்டாளியாக மெக்சிகோ விளங்கி வரும் நிலையில், இந்த சந்திப்பு பெரும் முக்கியத்துவம் பெறுகிறது.

மேலும், ஐ.நா. பொதுச்சபை கூட்டத்தின் இடைவேளையில், அமெரிக்கா, ஆஸ்திரேலியா உள்ளிட்ட பல்வேறு நாடுகளின் தலைவர்களுடனும் அதிபர் லீ தனித்தனியே சந்தித்து இருதரப்பு மற்றும் பிராந்திய விவகாரங்கள் குறித்து பேச்சுவார்த்தை நடத்த திட்டமிட்டுள்ளதாகவும் புளூ ஹவுஸ் தெரிவித்துள்ளது.

குறிப்பாக அமெரிக்கத் தலைமையுடனான சந்திப்பு, இரு நாடுகளின் பாதுகாப்பு கூட்டணியை மேலும் வலுப்படுத்தும் நோக்கில் அமையும் எனக் கூறப்படுகிறது.

Hindusthan Samachar / vidya.b