சிவகங்கை, 22 செப்டம்பர் (ஹி.ச.)

சிவகங்கை மாவட்டம் மானாமதுரை கிருஷ்ணராஜபுரத்தைச் சேர்ந்த ஆகாஷ், காவல்துறை விசாரணையின்போது உயிரிழந்ததாகக் கூறப்படும் வழக்கில், சிபிசிஐடி போலீசார் விசாரணை நடத்தி குற்றப்பத்திரிகை தாக்கல் செய்துள்ளனர்.

இந்த வழக்கில் குற்றச்சாட்டுக்கு உள்ளான காவல் ஆய்வாளர் திலீபன் உள்ளிட்ட 6 பேர் இன்று சிவகங்கை மாவட்ட நீதிமன்ற வளாகத்தில் உள்ள எஸ்.சி./எஸ்.டி. சிறப்பு நீதிமன்றத்தில் ஆஜராகினர்.

திலீபன், குகன், தெய்வேந்திரன், காளீஸ்வரன், மகேந்திரன், பழனி ஆகிய 6 பேரும் நீதிமன்றத்தில் ஆஜரான நிலையில், நீதிமன்ற வளாகத்தில் ஏடிஎஸ்பி சுகுமாரன் தலைமையில் பலத்த போலீஸ் பாதுகாப்பு போடப்பட்டிருந்தது.

சிபிசிஐடி விசாரணை முடிந்து குற்றப்பத்திரிகை தாக்கல் செய்யப்பட்டுள்ள நிலையில், இன்று நடைபெற்ற நீதிமன்ற ஆஜர் நடவடிக்கை முக்கியத்துவம் பெற்றது.

வழக்கில் தொடர்புடைய 6 பேரும் 20 நாட்களுக்குள் தலா ரூ.20 ஆயிரம் தொகையுடன் இரண்டு ஜாமீன் தாரர்கள் மூலம் பத்திரத்தை நீதிமன்றத்தில் தாக்கல் செய்ய வேண்டும் என நீதிபதி நாகராஜன் உத்தரவிட்டார்.

மேலும், வரும் அக்டோபர் 9-ஆம் தேதி அனைவரும் தவறாமல் மீண்டும் நீதிமன்றத்தில் ஆஜராக வேண்டும் என்றும் உத்தரவிடப்பட்டது.

வழக்கு விசாரணைக்கு அனைவரும் முழு ஒத்துழைப்பு வழங்க வேண்டும் என அறிவுறுத்திய நீதிபதி, தற்போது 6 பேரும் காவலர்கள் என்ற அடிப்படையில் அல்லாமல், குற்றச்சாட்டுக்கு உள்ளானவர்கள் என்ற நிலையில் நீதிமன்ற நடவடிக்கைகளை எதிர்கொள்ள வேண்டும் என சுட்டிக்காட்டினார்.

Hindusthan Samachar / GOKILA arumugam