சீனா, 23 செப்டம்பர் (ஹி.ச.)

வாஷிங்டனில் இந்த வாரம் நடைபெறவுள்ள அமெரிக்க அதிபர் டொனால்ட் டிரம்ப் மற்றும் சீன அதிபர் ஜி ஜின்பிங் இடையேயான முக்கிய சந்திப்புக்கு முன்னதாக, அமெரிக்காவிற்கான சீனத் தூதர் ஷீ ஃபெங் கடுமையான எச்சரிக்கை ஒன்றை விடுத்துள்ளார்.

தைவான் விவகாரம், மனித உரிமைகள் உள்ளிட்ட சில விவகாரங்களில் சீனாவுக்கு என சில சிவப்புக் கோடுகள் உள்ளன, அவற்றை ஒருபோதும் தாண்டக்கூடாது என்று அவர் இன்று தெரிவித்துள்ளார். வர்த்தகம் முதல் தைவான் வரை பல்வேறு விவகாரங்களில் நிலவும் கருத்து வேறுபாடுகளால் பாதிக்கப்பட்டுள்ள இரு நாடுகளுக்கும் இடையிலான உறவில் நிலைத்தன்மையை கொண்டுவர இந்த உச்சி மாநாடு முயல்கிறது.

சீன கம்யூனிஸ்ட் கட்சியின் அதிகாரப்பூர்வ நாளேடான மக்கள் தினசரியில் எழுதிய கட்டுரையில், தூதர் ஷீ ஃபெங், கருத்து வேறுபாடுகளை நிர்வகிப்பது நல்லெண்ணத்தை பொறுத்தே அமையும் என்று குறிப்பிட்டுள்ளார். தேசிய பாதுகாப்பு, பொருளாதார ஏற்றத்தாழ்வுகள், கட்டாய உழைப்பு போன்ற காரணங்களை கற்பனையாக உருவாக்கி சீனாவை கட்டுப்படுத்தும் முயற்சியை அமெரிக்கா நிறுத்த வேண்டும் என்றும் அவர் வலியுறுத்தியுள்ளார்.

சீனாவும் அமெரிக்காவும் ஒத்துழைக்கும்போது இரு தரப்பினரும் பயனடைவார்கள், ஆனால் மோதிக்கொள்ளும்போது இரு தரப்பினரும் பாதிக்கப்படுவார்கள் என்று அவர் சுட்டிக்காட்டியுள்ளார்.

சீனாவின் இறையாண்மை, பாதுகாப்பு மற்றும் வளர்ச்சி நலன்களை மீற முடியாது என்று கூறியுள்ள தூதர், நான்கு சிவப்புக் கோடுகளை பட்டியலிட்டுள்ளார். அவை தைவான் பிரச்சினை, ஜனநாயகம் மற்றும் மனித உரிமைகள், வளர்ச்சிப் பாதைகள் மற்றும் அமைப்புகள், மற்றும் வளர்ச்சி உரிமைகள் ஆகியவை ஆகும். இந்த நான்கு விவகாரங்களிலும் சவால் விடுவதை ஏற்க முடியாது என்று அவர் திட்டவட்டமாக தெரிவித்துள்ளார். சீனா அமைதியான வளர்ச்சியை தொடர உறுதிபூண்டுள்ளதாகவும், அமெரிக்காவும் இதே பாதையில் நகரும் என்று நம்புவதாகவும் அவர் கூறியுள்ளார்.

ஜனநாயக முறையில் ஆட்சி செய்யப்படும் தைவானை தனது பிரதேசத்தின் ஒரு பகுதியாக சீனா உரிமை கோரி வருகிறது, இதற்கு தைபே அரசு கடும் எதிர்ப்பு தெரிவித்து வருகிறது. முறையான தூதரக உறவுகள் இல்லாவிட்டாலும், தைவானின் மிக முக்கியமான ஆயுத வழங்குநராகவும், சர்வதேச ஆதரவாளராகவும் அமெரிக்கா திகழ்கிறது. இந்த சூழலில் உயர்மட்ட ராஜதந்திரமே சீன-அமெரிக்க உறவுகளின் நிலையான கரம் என்றும், கருத்து வேறுபாடுகளுக்கு அஞ்சத் தேவையில்லை என்றும் ஷீ ஃபெங் குறிப்பிட்டுள்ளார்.

வெளியுறவுக் கொள்கை குறித்த கருத்துக்களை தெரிவிக்க பயன்படுத்தப்படும் 'ஜாங் ஷெங்' அதாவது 'சீனாவின் குரல்' என்ற புனைப்பெயரில் வெளியான அந்த கட்டுரையில், மிகுந்த சிரமத்திற்கு மத்தியில் கிடைத்துள்ள சாதகமான சூழலை இரு தரப்பும் போற்றிப் பாதுகாக்க வேண்டும் என்றும், சரியான திசையை பராமரித்து, குறுக்கீடுகளை அகற்ற வேண்டும் என்றும் வலியுறுத்தப்பட்டுள்ளது.

குறிப்பாக அமெரிக்க தரப்பு தனது கொள்கைகளில் தொடர்ச்சியையும், நிலைத்தன்மையையும் பராமரிக்க வேண்டும், அளித்த வாக்குறுதிகளை மதிக்க வேண்டும், இருதரப்பு உறவுகளில் உறுதியை ஏற்படுத்த வேண்டும் என்றும் அந்த கட்டுரை அறிவுறுத்தியுள்ளது.

Hindusthan Samachar / vidya.b