சென்னை, 24 செப்டம்பர் (ஹி.ச.)

தேர்தல் ஆணையத்தின் தலைமைத் தேர்தல் ஆணையர் பதவி விலக வேண்டும் என்றும், வாக்காளர் பட்டியலின் சிறப்பு தீவிர திருத்தப் பணியை நிறுத்த வேண்டும் என்றும் முன்னாள் முதலமைச்சரும் திமுக தலைவருமான மு.க.ஸ்டாலின் வலியுறுத்துவது அரசியலமைப்பை பாதுகாப்பதற்கான நடவடிக்கை அல்ல என பாஜக தமிழ்நாடு தலைமை செய்தித் தொடர்பாளர் நாராயணன் திருப்பதி தெரிவித்துள்ளார்.

இது தொடர்பாக அவர் தனது எக்ஸ் தளப் பதிவில்,

எதிர்க்கட்சிகளுக்கு பிடிக்காத முடிவுகளை எடுக்கும் நிலையில், அரசியலமைப்புச் சட்டத்தின் கீழ் செயல்படும் தேர்தல் ஆணையத்தை குறிவைத்து விமர்சிப்பதாக குற்றம்சாட்டியுள்ளார்.

மூன்று பேர் கொண்ட தேர்தல் ஆணையத்தில், தேர்தல் ஆணையர்கள் தங்களது கருத்துகள், கேள்விகள் மற்றும் ஆட்சேபனைகளை பதிவு செய்வது இயல்பான நடைமுறை என்றும், 2023ஆம் ஆண்டு சட்டத்திலேயே ஆலோசனை மற்றும் தேவையான சூழலில் பெரும்பான்மை அடிப்படையில் முடிவெடுப்பதற்கான நடைமுறைகள் இடம்பெற்றுள்ளதாகவும் அவர் குறிப்பிட்டுள்ளார்.

கடந்த ஓராண்டில் சிறப்பு தீவிர வாக்காளர் பட்டியல் திருத்தம் உள்ளிட்ட தேர்தல் ஆணையத்தின் அனைத்து முடிவுகளும் முழு ஆணையத்தின் ஒருமித்த முடிவுகளாகவே எடுக்கப்பட்டதாக தேர்தல் ஆணையம் தெரிவித்துள்ளதாகவும் நாராயணன் திருப்பதி கூறியுள்ளார்.

தேர்தல் ஆணையர்கள் தங்களுக்குள் எந்த கருத்துகளையும் பரிமாறிக் கொள்ளவில்லை என்றால், அவர்களை பெயரளவில் செயல்படுபவர்கள் என விமர்சிப்பார்கள் என்றும், அதே நேரத்தில் அவர்கள் கருத்துகளை பதிவு செய்தால் அதை ஜனநாயகத்தின் மீதான தாக்குதல் என கூறுவது முரண்பாடானது என்றும் அவர் தெரிவித்துள்ளார்.

இறந்தவர்கள், ஒன்றுக்கு மேற்பட்ட இடங்களில் இடம்பெற்றுள்ளவர்கள் மற்றும் வேறு இடங்களுக்கு குடிபெயர்ந்தவர்களின் பெயர்களை வாக்காளர் பட்டியலில் இருந்து நீக்குவது வாக்குத் திருட்டு எனக் கூற முடியாது என்றும் அவர் குறிப்பிட்டுள்ளார். பல ஆண்டுகளாக பல்வேறு அரசியல் கட்சிகளும் வாக்காளர் பட்டியலில் உள்ள தவறுகள் குறித்து புகார் அளித்து வந்துள்ளதாகவும், அதற்கு தீர்வு காணும் வகையிலேயே சிறப்பு தீவிர திருத்தப் பணி மேற்கொள்ளப்படுவதாகவும் தெரிவித்துள்ளார்.

மேலும், வரைவு வாக்காளர் பட்டியலில் இருந்து பெயர்கள் நீக்கப்படுவது இறுதி முடிவு அல்ல என்றும், அதற்கு எதிராக உரிமைகோரல்கள், ஆட்சேபனைகள், விசாரணைகள் மற்றும் மேல்முறையீடுகளுக்கான நடைமுறைகள் உள்ளதாகவும் நாராயணன் திருப்பதி தெரிவித்துள்ளார்.

சிறப்பு தீவிர திருத்தத்துக்குப் பிறகு நடைபெறும் அனைத்து சட்டப்பேரவைத் தேர்தல் முடிவுகளும் சந்தேகத்திற்குரியவை எனக் கூறுவது வாக்காளர்களின் தீர்ப்பை கேள்விக்குள்ளாக்குவதாக அமையும் என்றும் அவர் தெரிவித்துள்ளார்.

மேற்கு வங்கத்தில் அதிக எண்ணிக்கையிலான பெயர்கள் நீக்கப்பட்ட தொகுதிகளில் திரிணாமுல் காங்கிரஸ் பல தொகுதிகளில் பெரும்பான்மையாக வெற்றி பெற்றிருப்பதை சுட்டிக்காட்டிய அவர், சிறப்பு தீவிர திருத்தம் ஒரு தரப்புக்கு மட்டுமே சாதகமாக மேற்கொள்ளப்பட்டது என்ற குற்றச்சாட்டை இது கேள்விக்குள்ளாக்குவதாக குறிப்பிட்டுள்ளார்.

தேர்தல் ஆணையம் திமுக, காங்கிரஸ் அல்லது பாஜக என எந்த அரசியல் கட்சிக்கும் சொந்தமான அமைப்பு அல்ல என்றும், ஆணையத்துக்குள் நடைபெறும் ஆலோசனைகள் சர்வாதிகாரம் அல்ல என்றும் நாராயணன் திருப்பதி தெரிவித்துள்ளார்.

தேர்தல் ஆணையத்தின் உள்நிலை ஆலோசனைகள் மற்றும் வாக்காளர் பட்டியல் திருத்தப் பணிகள் தொடர்பாக அரசியல் கட்சிகளுக்கு இடையே கருத்து வேறுபாடுகள் நிலவி வரும் நிலையில், வாக்காளர் பட்டியல் திருத்தப் பணியை எந்த ஒரு கட்சியையும் திருப்திப்படுத்துவதற்காக கைவிட முடியாது என்றும் அவர் தெரிவித்துள்ளார்.

Hindusthan Samachar / ANANDHAN