ஐதராபாத் , 05 செப்டம்பர் (ஹி.ச.)

தெலங்கானா முதல்-மந்திரி ரேவந்த் ரெட்டிக்கு எதிராக பி.ஆர்.எஸ். செயல் தலைவர் கே.டி.ஆர். கடுமையான குற்றச்சாட்டுகளை முன்வைத்துள்ளார்.

காங்கிரஸ் அரசின் ஆயிரம் நாள் ஆட்சியில் நடைபெற்றதாகக் கூறப்படும் மோசடிகளை கண்டித்து பி.ஆர்.எஸ். சார்பில் நடைபெற்ற ‘யுவபேரி’ கூட்டத்தில் கே.டி.ஆர். கலந்து கொண்டு பேசினார்.

அப்போது, தெலங்கானா இளைஞர்களுக்கு திறன் இல்லை என்று முதல்-மந்திரி ரேவந்த் ரெட்டி கூறுவதாகவும், இளைஞர்களின் திறமை குறித்து பேசுவதற்கு அவருக்கு என்ன தகுதி இருக்கிறது என்றும் கே.டி.ஆர். கேள்வி எழுப்பினார்.

ஓட்டுக்கு பணம் பெற்ற வழக்கில் சிக்கியவர்தான் ரேவந்த் ரெட்டி என்றும் அவர் விமர்சித்தார்.

ரேவந்த் ரெட்டி முதல்-மந்திரி ஆனது மக்கள் ஆதரவால் அல்ல என்றும், அதிர்ஷ்ட லாட்டரி அடித்ததால்தான் அவர் முதல்-மந்திரி பதவிக்கு வந்தார் என்றும் கே.டி.ஆர். கிண்டல் செய்தார்.

பிரதமர் மோடியையே நடுங்க வைத்த தெலங்கானா இளைஞர்களின் சக்திக்கு முன்னால் ரேவந்த் ரெட்டி ஒரு பொருட்டே இல்லை என்றும் அவர் கூறினார்.

தேர்தலுக்கு முன்பு ‘யூத் டிக்ளரேஷன்’ என்ற பெயரில் இளைஞர்களுக்கு காங்கிரஸ் கட்சி பல்வேறு வாக்குறுதிகளை அளித்ததாகவும், ஆட்சிக்கு வந்த பிறகு அந்த வாக்குறுதிகளை நிறைவேற்றாமல் வேலைவாய்ப்புகளை வழங்குவதிலும் அரசு தோல்வியடைந்துள்ளதாகவும் கே.டி.ஆர். குற்றம்சாட்டினார்.

கே.சி.ஆர். எம்.எல்.ஏ. பதவியை ராஜினாமா செய்ய வேண்டும் என்று காங்கிரஸ் தலைவர்கள் கூறி வருவதற்கு பதிலடி கொடுத்த அவர், “தெலங்கானா மாநிலத்தை உருவாக்கிய கே.சி.ஆர். ராஜினாமா செய்ய வேண்டுமா? அல்லது மக்களுக்கு அளித்த வாக்குறுதிகளை நிறைவேற்றாமல் ஏமாற்றிய ரேவந்த் ரெட்டி ராஜினாமா செய்ய வேண்டுமா?” என்று கேள்வி எழுப்பினார்.

மேலும், மக்களுக்கு செய்ததாகக் கூறப்படும் 420 வகையான மோசடிகளுக்காக ரேவந்த் ரெட்டி 420 முறை ராஜினாமா செய்ய வேண்டும் என்று கே.டி.ஆர். வலியுறுத்தினார்.

காங்கிரஸ் அரசில் அமைச்சர்கள் கமிஷனுக்காக ஒருவருக்கொருவர் மோதிக் கொள்வதாகவும் அவர் குற்றம்சாட்டினார். ஒரு அமைச்சரை மட்டும் பதவி நீக்கம் செய்யும் நாட்கள் அல்ல; விரைவில் காங்கிரஸ் அரசையே பதவி நீக்கம் செய்யும் நாட்கள் வரும் என்றும் கே.டி.ஆர். எச்சரித்தார்.

பி.ஆர்.எஸ். ஆட்சியின் 10 ஆண்டுகளில் 2 லட்சத்து 32 ஆயிரம் வேலைவாய்ப்புகள் வழங்கப்பட்டதாகவும், காங்கிரஸ் அரசு ஆயிரம் நாட்களில் வெறும் 16 ஆயிரம் வேலைவாய்ப்புகளை மட்டுமே வழங்கியுள்ளதாகவும் அவர் தெரிவித்தார்.

வேலைவாய்ப்பு தொடர்பாக காங்கிரஸ் தலைவர்கள் தன்னுடன் பகிரங்க விவாதத்திற்கு வர வேண்டும் என்றும் கே.டி.ஆர். சவால் விடுத்தார்.

Hindusthan Samachar / M.DEEPAK RAJA