நியூ டெல்லி , 05 செப்டம்பர் (ஹி.ச.)

டெஸ்ட் கிரிக்கெட்டில் சிறந்த பேட்ஸ்மேனாக ஆஸ்திரேலிய அணியின் முன்னணி வீரர் ஸ்டீவ் ஸ்மித்தை, அந்த அணியின் ஆல்-ரவுண்டர் கிளென் மேக்ஸ்வெல் தேர்வு செய்து புகழாரம் சூட்டியுள்ளார்.

2017-ம் ஆண்டு இந்தியாவில் நடைபெற்ற டெஸ்ட் தொடரில் ஆஸ்திரேலிய அணியின் ஒரு பகுதியாக தான் இருந்தபோது, ஸ்டீவ் ஸ்மித்தின் அபாரமான பேட்டிங்கை நேரில் பார்க்கும் வாய்ப்பு கிடைத்ததாகவும் அவர் தெரிவித்துள்ளார்.

இதுகுறித்து கிளென் மேக்ஸ்வெல் கூறுகையில், “2017-ம் ஆண்டு இந்தியாவில் நடைபெற்ற டெஸ்ட் தொடரில் நான் ஆஸ்திரேலிய அணியின் ஒரு பகுதியாக இருந்தேன்.

அந்த தொடரில் ஸ்டீவ் ஸ்மித் சில அற்புதமான சதங்களை அடித்து வேறொரு நிலைக்கு சென்று பேட்டிங் செய்தார்.

அந்த சுற்றுப்பயணத்தில் அவர் 3 சதங்கள் அடித்ததாக நினைக்கிறேன். அவர் உண்மையிலேயே அற்புதமான வீரர். அவரது ஆட்டத்தை நேரில் பார்க்கும் வாய்ப்பு கிடைத்தது எனது அதிர்ஷ்டம்” என்றார்.

ஆஸ்திரேலியாவுக்காக டெஸ்ட் கிரிக்கெட்டில் அதிக ரன்கள் குவித்த வீரர்களின் பட்டியலில் ஸ்டீவ் ஸ்மித் 4-வது இடத்தில் உள்ளார்.

இதுவரை 125 டெஸ்ட் போட்டிகளில் 223 இன்னிங்ஸ்களில் விளையாடியுள்ள அவர், 56.00 என்ற சராசரியுடன் 37 சதங்கள் மற்றும் 45 அரைசதங்கள் உள்பட 10,920 ரன்கள் குவித்துள்ளார்.

அவரது அதிகபட்ச ஸ்கோர் 239 ரன்கள் ஆகும். டெஸ்ட் கிரிக்கெட்டில் ஸ்மித்தின் அபாரமான சாதனைகளையும், அவரது பேட்டிங் திறமையையும் குறிப்பிட்டு மேக்ஸ்வெல் பாராட்டியுள்ளார்.

Hindusthan Samachar / M.DEEPAK RAJA