சென்னை, 07 செப்டம்பர் (ஹி.ச.)

இன்றைய சட்டப்பேரவையில் போதைப்பொருள் ஒழிப்பு குறித்த விவாதத்தில் பேசிய முதல்வர் விஜய், தமிழகத்தை அச்சுறுத்தி வரும் போதை கலாச்சாரம் குறித்து கடுமையான கருத்துக்களை முன்வைத்தார்.

போதைப்பொருள் என்பது சாதாரண பிரச்சனை அல்ல, அது ஆழமாக வேரூன்றிய ஒரு மரம் போன்றது என்று குறிப்பிட்ட அவர், இதுவரை நாம் அந்த மரத்தின் ஒரு சில கிளைகளை மட்டுமே வெட்டியுள்ளோம், முழு மரத்தையும் வேரோடு சாய்க்க வேண்டிய கடமை நமக்கு இருக்கிறது என்று தெரிவித்தார்.

மேலும் பேசிய அவர், கடந்த கால ஆட்சியாளர்கள் இந்த போதைப்பொருள் கலாச்சாரத்தின் தீவிரத்தை உணராமல் அலட்சியமாக இருந்துவிட்டதாக குற்றம்சாட்டினார்.

அவர்களின் கவனக்குறைவு காரணமாகவே இன்று இந்த நச்சு கலாச்சாரம் இளைஞர்கள் மத்தியில் வேகமாக பரவி, சமூகத்தின் அடித்தளத்தையே ஆட்டம் காண வைத்துள்ளது என்றும் அவர் வேதனை தெரிவித்தார்.

தனது அரசு போதைப்பொருளுக்கு எதிராக சமரசமற்ற நடவடிக்கைகளை எடுத்து வருவதாகவும், காவல்துறை மற்றும் போதைப்பொருள் தடுப்பு பிரிவு மூலம் தொடர் சோதனைகள் நடத்தப்பட்டு பல கிலோ போதைப்பொருட்கள் பறிமுதல் செய்யப்பட்டுள்ளதாகவும் அவர் பேரவையில் புள்ளிவிவரங்களுடன் எடுத்துரைத்தார்.

இது வெறும் தொடக்கம் மட்டுமே என்றும், போதைப்பொருள் வலைப்பின்னலின் வேர்களை கண்டறிந்து முற்றிலுமாக ஒழிக்கும் வரை இந்த போராட்டம் ஓயாது என்றும் அவர் உறுதிபட தெரிவித்தார்.

Hindusthan Samachar / vidya.b