சென்னை, 07 செப்டம்பர் (ஹி.ச.)

சட்டப்பேரவையில் இன்று பேசிய முதல்வர் விஜய், அரசு ஊழியர்கள் தங்களது பணிகளில் முழுமையான நேர்மையுடனும், அர்ப்பணிப்புடனும் செயல்பட வேண்டும் என்று வலியுறுத்தியுள்ளார்.

அரசு நிர்வாகத்தின் முதுகெலும்பாக திகழ்பவர்கள் அரசு ஊழியர்களே என்றும், மக்களுக்கு சேவை செய்வதே அவர்களின் முதன்மைக் கடமை என்றும் அவர் குறிப்பிட்டார். இந்த நிலையில், ஒரு சிலர் தங்களின் தனிப்பட்ட சுயலாபத்திற்காக லஞ்சம் பெறுவதிலும், ஊழல் நடவடிக்கைகளில் ஈடுபடுவதிலும் செயல்படுவதை ஒருபோதும் ஏற்றுக்கொள்ள முடியாது என்று கடுமையாக எச்சரித்தார்.

அரசின் நலத்திட்டங்களும், மக்கள் நலன் சார்ந்த சேவைகளும் கடைக்கோடி மக்களைச் சென்றடைய வேண்டுமெனில், ஊழலற்ற வெளிப்படையான நிர்வாகம் அவசியம் என்று முதல்வர் விஜய் தெரிவித்தார். ஊழல் என்பது வளர்ச்சிக்கு மிகப்பெரிய தடையாக இருப்பதோடு, அரசின் மீதான மக்களின் நம்பிக்கையை சிதைக்கும் செயல் என்றும் அவர் வேதனை தெரிவித்தார்.

மேலும், மாநிலத்தில் ஊழலை முற்றிலுமாக ஒழிக்க அரசு உறுதி பூண்டுள்ளதாக தெரிவித்த முதல்வர், ஊழல் தடுப்பு அமைப்புகள் மற்றும் கண்காணிப்பு அமைப்புகள், ஊழல் புகார்கள் மீது எந்தவித தயக்கமும், அரசியல் தலையீடும் இன்றி, சட்டப்பூர்வமான கடுமையான நடவடிக்கைகளை மேற்கொள்ள வேண்டும் என்று உத்தரவிட்டார். யாராக இருந்தாலும் சட்டத்தின் முன் அனைவரும் சமம் என்பதை உறுதி செய்ய வேண்டும் என்றும் அவர் பேரவையில் பேசினார்.

Hindusthan Samachar / vidya.b