சென்னை , 24 ஏப்ரல் (ஹி.ச.)

அமெரிக்காவின் தலைசிறந்த நூலகங்களில் ஒன்றாகவும், உலகின் மிகப்பெரிய நூலகமாகவும் திகழும் வாஷிங்டனில் உள்ள ‘லைப்ரரி ஆப் காங்கிரஸ்’-க்கு இன்று பிறந்தநாள். ஆம், இன்று தான் இந்த மாபெரும் நூலகம் திறக்கப்பட்டது.

நூலகத்தின் உருவாக்கம்:

அமெரிக்க நாடாளுமன்றத்திற்குப் பயனுள்ள புத்தகங்களை வாங்கிச் சேகரிக்க வேண்டும் என்ற நோக்கத்துடன் அப்போதைய அமெரிக்க அதிபர் ஜான் ஆடம்ஸ், 5,000 டாலர்கள் ஒதுக்கினார். அதன்படி, 1800 ஆம் ஆண்டு ஏப்ரல் 24 ஆம் தேதி இந்த நூலகம் தொடங்கப்பட்டது.

அழிவை சந்தித்து மீண்டெழுந்தது :

நூலகம் திறக்கப்பட்டு 12 ஆண்டுகள் கழித்து, தலைநகர் வாஷிங்டனுக்குள் நுழைந்த பிரிட்டன் இராணுவம், நகரைத் தீக்கிரையாக்கியது. இதில் இந்த நூலகத்தின் பெரும்பாலான புத்தகங்கள் எரிந்து சாம்பலாயின.முன்னாள் அதிபர் தாமஸ் ஜெபர்ஸன், தனது சொந்த நூலகத்திலிருந்து புத்தகங்களைத் தந்து நூலகத்தைப் புதுப்பிக்க உதவினார். அவர் நடத்திவந்த அவரது சொந்த நூலகம்தான் அந்தக் காலகட்டத்தில் அமெரிக்காவிலேயே மிகப் பெரிய நூலகம். 2 முறை அதிபராக இருந்த காலகட்டத்தில் ‘லைப்ரரி ஆஃப் காங்கிரஸ்’ நூலகத்தை விரிவாக்கும் பணிகளில் முழுமூச்சுடன் அவர் ஈடுபட்டார்.

இதற்கிடையே, 1851 ஆம் ஆண்டு மீண்டும் ஒரு தீவிபத்து ஏற்பட்டது. இதில் நூலகத்தின் மூன்றில் ஒரு பகுதி நூல்கள் எரிந்து நாசமாயின. தாமஸ் ஜெபர்ஸன் கொடுத்த பல நூல்களும் தப்பவில்லை. இந்த முறை அமெரிக்க நாடாளுமன்றம் விரைவாகச் செயல்பட்டு புத்தகங்களைச் சேகரித்து மீண்டும் புதுப்பித்தது.

உலகின் மிகப்பெரிய நூலம்

அமெரிக்காவின் உள்நாட்டுப் போருக்குப் பின்னர், இன்னும் அதிகமான எண்ணிக்கையில் புத்தகங்கள் சேகரிக்கப்பட்டன. 20-ம் நூற்றாண்டில் அமெரிக் காவின் அறிவிக்கப்படாத தேசிய நூலக மாகவும், உலகின் மிகப் பெரிய நூலகமாகவும் விரிவடைந்திருந்தது ‘லைப்ரரி ஆஃப் காங்கிரஸ்'.

சிறப்பம்சங்கள்:

3.7 கோடிப் புத்தகங்கள் மற்றும் அச்சுப் பிரதிகள்.

35 லட்சத்துக்கும் அதிகமான ஒலிப் பதிவு, ஆவணங்கள்!

1.4 கோடிப் புகைப் படங்கள்,55 லட்சம் வரைபடங்கள், ஓவியங்கள்!

470 மொழிகளில், 16 கோடி தொகுப்புகள்!

838 மைல் நீள நூலகத்தின் புத்தக அலமாரிகள்!

இந்நூலகத்தின் கிளை அலுவலகங்கள் டெல்லி,கெய்ரோ, ரியோ டி ஜெனிரோ போன்ற உலகின் முக்கிய நகரங்களில் செயல்படுகின்றன என்பது குறிப்பிடத்தக்கது.

Hindusthan Samachar / J. Sukumar