சண்டிகர் , 5 ஆகஸ்ட் (ஹி.ச.)

பஞ்சாப்பில் மொஹாலி மாவட்டத்தில் உள்ள ஒரு கிராமம், குடும்பத்தினர் மற்றும் சமூக ஒப்புதல் இல்லாமல் நடக்கும் காதல் திருமணங்களை தடை செய்து கிராம பஞ்சாயத்தில் தீர்மானம் நிறைவேற்றியுள்ளது.

கிராம பஞ்சாயத்தின் இத்தகைய செயல் புதிய சர்ச்சையை எழுப்பியிருப்பதோடு, அரசியல் தலைவர்கள் மற்றும் சமூக ஆர்வலர்கள் இதற்கு கண்டனம் தெரிவித்துள்ளனர்.

ஜூலை 31 அன்று ஒருமனதாக நிறைவேற்றப்பட்ட தீர்மானம், தங்கள் குடும்பங்களின் ஒப்புதல் இல்லாமல் திருமணம் செய்து கொள்ளும் தம்பதிகள் கிராமத்திலோ அல்லது அருகிலுள்ள பகுதிகளிலோ வசிப்பதைத் தடை செய்கிறது.

அத்தகைய ஜோடிகளை ஆதரிக்கும் அல்லது தங்க வைக்கும் எந்தவொரு கிராமவாசிக்கும் எதிராக தண்டனை நடவடிக்கை எடுக்கப்படும் என்றும் இது எச்சரிக்கிறது.

இது ஒரு தண்டனை அல்ல, ஆனால் நமது மரபுகள் மற்றும் மதிப்புகளைப் பாதுகாப்பதற்கான ஒரு தடுப்பு நடவடிக்கை என்று கிராம சர்பஞ்ச் தல்வீர் சிங் கூறினார்.

26 வயது டேவிந்தர் என்ற நபர் தனது 24 வயது பெண் பேபியை மணந்த சமீபத்திய சம்பவத்தைத் தொடர்ந்து இந்தத் தீர்மானம் நிறைவேற்றப்பட்டதாக அவர் விளக்கினார். அந்த ஜோடி கிராமத்தை விட்டு வெளியேறி விட்டனர், ஆனால் இந்த சம்பவம் இங்கு வசிக்கும் 2,000 கிராம மக்களுக்கு தாக்கத்தை ஏற்படுத்தியுள்ளது. காதல் திருமணம் அல்லது சட்டத்தை நாங்கள் எதிர்க்கவில்லை, ஆனால் எங்கள் பஞ்சாயத்தில் அதை நாங்கள் அனுமதிப்பதில்லை, என்று சிங் மேலும் கூறினார்.

தீர்மானத்தின்படி, இதுபோன்ற திருமணங்களைத் தடுக்கும் பொறுப்பை முழு சமூகமும் பகிர்ந்து கொள்கிறது. பஞ்சாயத்து அண்டை கிராமங்களையும் இதே போன்ற நடவடிக்கைகளை எடுக்க வலியுறுத்தியுள்ளது.

இந்த நடவடிக்கை ஒரு பின்னடைவை ஏற்படுத்தியுள்ளது. பாட்டியாலாவைச் சேர்ந்த காங்கிரஸ் எம்.பி. தரம்வீர காந்தி, இந்தத் தீர்மானத்தைக் கண்டித்து, அதை தலிபான் உத்தரவு என்று விமர்சித்துள்ளார். ஒருவரின் வாழ்க்கைத் துணையைத் தேர்ந்தெடுக்கும் சுதந்திரம் ஒவ்வொரு வயதுவந்தவரின் அடிப்படை உரிமை. அரசு தலையிட்டு, அத்தகைய ஜோடிகளை தெளிவற்ற மனப்பான்மையிலிருந்து பாதுகாக்க வேண்டும், என்று அவர் கூறினார்.

இந்தத் தீர்மானம் சில தரப்பினரிடமிருந்து சீற்றத்தைத் தூண்டிய போதிலும், உள்ளூர் இளைஞர்களும் கிராம மக்களும், பஞ்சாயத்தின் இந்த தீர்மானத்திற்கு ஆதரவு தெரிவித்துள்ளனர். இந்த சம்பவம் குறித்து உள்ளூர் அதிகாரிகள் இதுவரை எந்த நவடிக்கையும் எடுக்கவில்லை. மொஹாலியின் கூடுதல் துணை ஆணையர் (கிராமப்புறம்) சோனம் சவுத்ரி, இதுவரை முறையான புகார் எதுவும் பதிவு செய்யப்படவில்லை என்று கூறியுள்ளார்.

காவல்துறை கண்காணிப்பாளர் (மொஹாலி) மோஹித் அகர்வால், இந்த சம்பவம் குறித்து அளித்த விளக்கத்தில், ”நாங்கள் சட்டத்தையும் அரசியலமைப்பு உரிமைகளையும் நிலைநிறுத்துவோம். தற்போது வரை, எந்த அதிகாரப்பூர்வ புகாரும் பெறப்படவில்லை. அது வந்தால், சட்டத்தின்படி செயல்படுவோம். யாருக்கும் அதிகாரத்தை தங்கள் கைகளில் எடுத்துக்கொள்ள உரிமை இல்லை என்று தெரிவித்துள்ளார்.

Hindusthan Samachar / J. Sukumar