புதுடெல்லி, 30 ஜனவரி (ஹி.ச.)

நாளை (ஜனவரி 31) இரண்டாவது இந்தியா-அரபு வெளியுறவு அமைச்சர்கள் கூட்டம் (IAFMM) இந்தியாவில் நடைபெறுகிறது.

இந்தக் கூட்டத்திற்கு இந்தியாவும் ஐக்கிய அரபு அமீரகமும் இணைந்து தலைமை தாங்குகிறது. அரபு லீக் உறுப்பு நாடுகளின் அனைத்து வெளியுறவு அமைச்சர்களும் மற்றும் அரபு லீக் பொதுச் செயலாளரும் இரண்டாவது இந்தியா-அரபு வெளியுறவு அமைச்சர்கள் கூட்டத்தில் பங்கேற்கவுள்ளனர்.

இந்த வெளியுறவு அமைச்சர்கள் கூட்டம் 10 ஆண்டுகளுக்குப் பிறகு நடைபெறுகிறது.

முதல் கூட்டம் 2016-ஆம் ஆண்டு பஹ்ரைனில் நடைபெற்றது. முதல் வெளியுறவு அமைச்சர்கள் கூட்டத்தில், அமைச்சர்கள் பொருளாதாரம், எரிசக்தி, கல்வி, ஊடகம் மற்றும் கலாச்சாரம் ஆகிய ஐந்து முன்னுரிமைத் துறைகளை அடையாளம் கண்டு, இந்தத் துறைகளில் பல நடவடிக்கைகளை முன்மொழிந்தனர்.

இரண்டாவது இந்தியா-அரபு வெளியுறவு அமைச்சர்கள் கூட்டத்திலும் (IAFMM) அது தொடர்பான நிகழ்வுகளிலும் பங்கேற்பதற்காக அகமது அபுல் கெய்ட் நேற்று (ஜனவரி 29) புதுடெல்லிக்கு வருகை புரிந்தார்.

இந்திய தலைநகர் புதுடெல்லியில் இன்று (ஜனவரி 30), வெளியுறவுத் துறை அமைச்சர் எஸ். ஜெய்சங்கர், அரபு நாடுகளின் கூட்டமைப்பின் பொதுச் செயலாளர் அகமது அபுல் கெய்ட்டை சந்தித்து, இந்தியாவுக்கும் அரபு லீக்கிற்கும் இடையிலான பரந்த அளவிலான துறைகளில் ஒத்துழைப்பை வலுப்படுத்துவது குறித்து விவாதித்தார்.

இந்தச் சந்திப்பிற்குப் பிறகு, வெளியுறவுத் துறை அமைச்சர் ஜெய்சங்கர் எக்ஸ் சமூக வலைதளத்தில் வெளியிட்ட பதிவில் கூறியிருப்பதாவது,

இன்று காலை அரபு நாடுகளின் கூட்டமைப்பின் பொதுச் செயலாளர் அகமது அபுல் கெய்ட்டுடன் ஒரு சுமுகமான சந்திப்பு நடைபெற்றது. எங்கள் ஒத்துழைப்பு மற்றும் பல்வேறு துறைகளில் அதை வலுப்படுத்துவது குறித்து விரிவான உரையாடல் நடத்தினோம்.

பிராந்தியத்தில் சமீபத்திய நிகழ்வுகள் குறித்தும் கருத்துக்களைப் பரிமாறிக்கொண்டோம், என்று கூறினார்.

Hindusthan Samachar / vidya.b