நகோயா, 01 அக்டோபர் (ஹி.ச.)

2026 ஆசிய விளையாட்டுப் போட்டியில் பாய்மரப் படகுப் போட்டியில் இந்தியா தனது முதல் பதக்கத்தை வென்றுள்ளது. ஆடவர் ஸ்கிஃப் பிரிவில் இந்தியாவின் பிரின்ஸ் குரிசிங்கல் நோபல் மற்றும் மனு பிரான்சிஸ் இணை சிறப்பாக செயல்பட்டு வெள்ளிப் பதக்கத்தை கைப்பற்றியுள்ளது.

கடந்த சில நாட்களாக நடைபெற்ற ஸ்கிஃப் பிரிவு போட்டியில் மொத்தம் 9 பந்தயங்கள் நடத்தப்பட்டன. இதில் இந்திய ஜோடி தொடக்கம் முதலே சீரான ஆட்டத்தை வெளிப்படுத்தியது.

ஒரு பந்தயத்தில் முதலிடத்தையும் பிடித்திருந்த இந்திய இணை, பதக்கத்தை உறுதி செய்வதற்கான முக்கியமான கட்டத்தில் கடும் போட்டியை எதிர்கொண்டது.

பதக்கத்தை தீர்மானிக்கும் 9-வது மற்றும் கடைசி பந்தயத்தில் பிரின்ஸ் குரிசிங்கல் நோபல் மற்றும் மனு பிரான்சிஸ் ஜோடி சிறப்பான ஆட்டத்தை வெளிப்படுத்தியது. இந்தப் பந்தயத்தில் 2-வது இடத்தைப் பிடித்ததன் மூலம், ஒட்டுமொத்தப் புள்ளிகள் அடிப்படையில் இந்திய அணி வெள்ளிப் பதக்கத்தை உறுதி செய்தது.

9 பந்தயங்களின் முடிவில் இந்திய ஜோடி 23 புள்ளிகளைப் பெற்று 2-வது இடத்தை பிடித்தது. இதன் மூலம் 2026 ஆசிய விளையாட்டுப் போட்டியில் பாய்மரப் படகுப் போட்டியில் இந்தியாவுக்கு முதல் பதக்கம் கிடைத்துள்ளது.

இந்தப் பிரிவில் சீன அணி முதலிடத்தைப் பிடித்து தங்கப் பதக்கத்தை வென்றது. ஹாங்காங் அணி 3-வது இடத்தைப் பிடித்து வெண்கலப் பதக்கத்தை கைப்பற்றியது.

பாய்மரப் படகுப் போட்டியில் இந்தியாவுக்கு முதல் பதக்கத்தைப் பெற்றுத் தந்த பிரின்ஸ் குரிசிங்கல் நோபல் மற்றும் மனு பிரான்சிஸ் இணையின் சாதனைக்கு விளையாட்டு ரசிகர்கள் மற்றும் பல்வேறு தரப்பினரும் வாழ்த்து தெரிவித்து வருகின்றனர்.

Hindusthan Samachar / Durai.J