ஆந்திர மாநிலம், 01 அக்டோபர் (ஹி.ச.)

ஆந்திர மாநிலத்தில் பிரதான் மந்திரி ஆவாஸ் யோஜனா - கிராமீன் 2.0 திட்டத்தின் கீழ் கட்டப்படும் வீடுகளில் நவீன 3D கான்கிரீட் பிரிண்டிங் தொழில்நுட்பத்தை பயன்படுத்தும் முயற்சி மேற்கொள்ளப்பட உள்ளது.

முதற்கட்டமாக தெனாலி தொகுதிக்கு உட்பட்ட புரிப்பாளையம் பகுதியில் இந்தத் தொழில்நுட்பத்தைப் பயன்படுத்தி 100 வீடுகள் கட்ட திட்டமிடப்பட்டுள்ளது. இதற்கான ஒப்பந்தம் முதலமைச்சர் சந்திரபாபு நாயுடு முன்னிலையில் அக்டோபர் 4-ம் தேதி கையெழுத்தாக உள்ளதாக தெரிவிக்கப்பட்டுள்ளது.

இந்தத் திட்டத்தை மத்திய கட்டிட ஆராய்ச்சி நிறுவனம் செயல்படுத்த உள்ளது. வெளிநாடுகள் மற்றும் தனியார் கட்டுமானத் துறைகளில் ஏற்கனவே பயன்படுத்தப்பட்டு வரும் 3D கான்கிரீட் பிரிண்டிங் முறையை, இந்தியாவின் தட்பவெப்பநிலை மற்றும் கட்டுமானத் தேவைகளுக்கு ஏற்ற வகையில் மேம்படுத்தி பயன்படுத்துவதற்கான வடிவமைப்பும் தயாரிக்கப்பட்டுள்ளது.

மத்திய அரசின் விதிமுறைகளின்படி, ஒவ்வொரு வீடும் சுமார் 325 சதுர அடி பரப்பளவில் கட்டப்பட உள்ளது. மேலும், வழக்கமான கட்டுமான முறையில் வழங்கப்படும் நிதியுதவியுடன் ஒப்பிடும்போது, 3D பிரிண்டிங் தொழில்நுட்பத்தில் கட்டப்படும் வீடுகளுக்கு கூடுதல் நிதி வழங்கப்பட உள்ளது. இந்த கூடுதல் செலவை புதிய தொழில்நுட்பத்தை ஊக்குவிக்கும் வகையில் மத்திய மற்றும் மாநில அரசுகள் ஏற்கும் என தெரிவிக்கப்பட்டுள்ளது.

3D கான்கிரீட் பிரிண்டிங் என்பது கணினி கட்டுப்பாட்டில் இயங்கும் நவீன கட்டுமான தொழில்நுட்பமாகும். முதலில் கட்டிட வடிவமைப்பு 3D CAD மென்பொருள் மூலம் உருவாக்கப்படுகிறது. பின்னர், பிரத்யேகமாக தயாரிக்கப்பட்ட கான்கிரீட் கலவை இயந்திரத்தின் மூலம் அச்சுப்பொறிக்கு அனுப்பப்படுகிறது.

கணினி நிரலின் அடிப்படையில் இயங்கும் ரோபோ கை அல்லது கேன்ட்ரி பிரிண்டர், கான்கிரீட்டை குறிப்பிட்ட பாதையில் அடுக்குகளாகப் பதித்து சுவர்கள் உள்ளிட்ட கட்டமைப்புகளை உருவாக்கும். ஒவ்வொரு அடுக்கும் விரைவாக கடினமடையும் வகையில் கலவை தயாரிக்கப்படுகிறது.

இந்த முறையில் பாரம்பரிய கட்டுமானத்தைவிட 50 முதல் 70 சதவீதம் வரை வேகமாக பணிகளை முடிக்க முடியும் என தெரிவிக்கப்பட்டுள்ளது. மேலும், மூலப்பொருள் விரயம் குறைவதுடன், சிக்கலான வடிவமைப்புகளையும் உருவாக்க முடியும் என கூறப்படுகிறது.

முதற்கட்டமாக கட்டப்படும் 100 வீடுகளின் செயல்பாடு, பொதுமக்களின் வரவேற்பு மற்றும் பயன்பாட்டு வசதிகளை மதிப்பீடு செய்த பின்னர், இந்தத் தொழில்நுட்பத்தை ஆந்திர மாநிலத்தின் பிற பகுதிகளுக்கும், பின்னர் நாடு முழுவதும் விரிவுபடுத்த திட்டமிடப்பட்டுள்ளது.

Hindusthan Samachar / LOGESHWARI V