புதுடெல்லி, 10 அக்டோபர் (ஹி.ச.)

டெல்லியில் ஜந்தர் மந்தர் பகுதியில் நடைபெறவிருந்த போராட்டங்களை முன்னிட்டு, மெட்ரோ ரயில் மற்றும் ரயில் போக்குவரத்துக்கு விதிக்கப்பட்ட கட்டுப்பாடுகள் தொடர்பாக உச்சநீதிமன்றத்தின் அக்டோபர் 9-ஆம் தேதி உத்தரவு மீறப்பட்டதாகக் கூறி, நீதிமன்ற அவமதிப்பு மனு தாக்கல் செய்யப்பட்டுள்ளது.

வழக்கறிஞர் ஷைலேந்திர மணி திரிபாதி தாக்கல் செய்துள்ள இந்த மனுவில், உச்சநீதிமன்றத்தின் உத்தரவு இருந்தபோதிலும், டெல்லி மெட்ரோ ரயில் நிறுவனம் (DMRC) 45 மெட்ரோ ரயில் நிலையங்களின் நுழைவு மற்றும் வெளியேறும் வாயில்களை மூடுவதாக அறிவித்ததாகக் குற்றம்சாட்டப்பட்டுள்ளது.

மேலும், இரவு 9.30 மணியளவில் ஜிடிபி நகர் மற்றும் விஸ்வவித்யாலயா மெட்ரோ ரயில் நிலையங்களுக்குச் சென்றபோது, அங்குள்ள நுழைவு வாயில்கள் மூடப்பட்டிருந்ததாகவும், இதனைத் தாம் காணொளியாகப் பதிவு செய்துள்ளதாகவும் மனுதாரர் தெரிவித்துள்ளார்.

ஜந்தர் மந்தர் பகுதியில் இரவு 8.30 மணியளவில் பார்வையிட்டபோது, அங்கு காவல்துறையினர் மற்றும் துணை ராணுவப் படையினர் மட்டுமே இருந்ததாகவும், போராட்டக்காரர்கள் யாரும் இல்லை என்றும் அவர் தனது மனுவில் குறிப்பிட்டுள்ளார்.

அத்துடன், ரயில் சேவைகள் ரத்து செய்யப்படுவது தொடர்ந்து நடைபெற்று வருவதாகவும், மாற்றுப் போக்குவரத்து ஏற்பாடுகள் குறித்த தகவல்கள் பொதுமக்களுக்குப் போதிய அளவில் தெரிவிக்கப்படவில்லை என்றும் குற்றம்சாட்டப்பட்டுள்ளது.

இந்த விவகாரத்தில் மத்திய உள்துறைச் செயலாளர் கோவிந்த் மோகன், டெல்லி காவல் ஆணையர் அனுராக் குமார் மற்றும் டெல்லி மெட்ரோ ரயில் நிறுவனத்தின் தலைவர் டி. தாரா ஆகியோருக்கு எதிராக நீதிமன்ற அவமதிப்பு நடவடிக்கை எடுக்க வேண்டும் என்றும், ஒட்டுமொத்த போக்குவரத்துக்கும் விதிக்கப்பட்ட கட்டுப்பாடுகளை உடனடியாகத் திரும்பப் பெற வேண்டும் என்றும் மனுவில் கோரப்பட்டுள்ளது.

Hindusthan Samachar / VINOTH KUMAR P