திருவனந்தபுரம் , 13 அக்டோபர் (ஹி.ச.)

கேரளாவில் காப்பா சட்டத்தை அரசு ரத்து செய்ய வேண்டும் என்றும், சிறைகளில் போதைப்பொருள் விற்பனை நடைபெறுவதாகவும் திருவனந்தபுரம் மாநகராட்சி பா.ஜ.க. கவுன்சிலர் ஆர். சுகதன் குற்றம் சாட்டியுள்ளார்.

இதுகுறித்து அவர் கூறியதாவது:-

கேரளாவில் காப்பா சட்டம் அரசியல் கட்சிகளும், காவல்துறையும் தவறாகப் பயன்படுத்தும் சட்டமாக மாறிவிட்டது.

அரசியல் பழிவாங்கும் நோக்கில், என் மீதும் இந்தச் சட்டத்தின் கீழ் நடவடிக்கை எடுத்து சிறையில் அடைத்தனர். எனவே, காப்பா சட்டத்தை அரசு முதலில் ரத்து செய்ய வேண்டும்.

குற்றவாளிகளைத் திருத்த வேண்டிய அமைப்புகளே, அவர்களை மேலும் பெரிய குற்றங்களில் ஈடுபடத் தூண்டும் சூழல் நிலவுகிறது.

சிறார் இல்லங்கள், சீர்திருத்தப் பள்ளிகள் மற்றும் சிறைகளில் உள்ள பிரச்சினைகளுக்குத் தீர்வு காண அரசு நடவடிக்கை எடுக்க வேண்டும்.

சிறைகளுக்குள் போதைப்பொருள் புழக்கம் இருப்பதால், ‘ஆபரேஷன் தூபான்’ நடவடிக்கையை முதலில் சிறைகளில்தான் செயல்படுத்த வேண்டும் என்று ஏற்கனவே கூறியிருந்தேன்.

கண்ணூர் பெண்கள் சிறையில் இருந்து எம்.டி.எம்.ஏ. போதைப்பொருள் கைப்பற்றப்பட்ட சம்பவம், சிறைகளில் போதைப்பொருள் புழக்கம் குறித்த எனது கருத்தை உறுதிப்படுத்துகிறது.

சிறைக்கு முதன்முறையாக வரும் சாதாரண மனிதர்கள், அங்குள்ள சூழல் காரணமாக ஒன்று அல்லது இரண்டு நாட்களுக்குக்கூட தூங்க முடியாத நிலையைச் சந்திக்கின்றனர்.

தூக்கமின்மை உள்ளிட்ட பல்வேறு பிரச்சினைகளும் ஏற்படுகின்றன.

நான் தங்கியிருந்த சிறைப் பிரிவுகளில் நேரடியாக போதைப்பொருள் விற்பனையைப் பார்க்கவில்லை.

இருப்பினும், மற்ற சிறைப் பிரிவுகளில் இருந்து வருபவர்கள் மற்றும் வேறு சிறைகளுக்கு மாற்றப்படுபவர்கள் மூலமாக, சிறைகளில் போதைப்பொருள் தொடர்பான நடவடிக்கைகள் நடைபெறுவது தெரியவருகிறது.

எனவே, காப்பா சட்டத்தின் தவறான பயன்பாட்டைத் தடுக்கவும், சிறைகளில் போதைப்பொருள் புழக்கத்தைக் கட்டுப்படுத்தவும் அரசு உரிய நடவடிக்கை எடுக்க வேண்டும்.

இவ்வாறு ஆர். சுகதன் கூறினார்.

Hindusthan Samachar / M.DEEPAK RAJA