திருச்சி, 13 அக்டோபர் (ஹி.ச.)

திருச்சி மாவட்டம் தொட்டியம் - காட்டுப்புத்தூர் சாலையில் செல்வராணி என்ற பெண் மீன் விற்பனை செய்து வந்தார். அவர் நேற்று வழக்கம்போல் சாலையோரத்தில் மீன் விற்பனையில் ஈடுபட்டிருந்தார்.

அப்போது அந்த வழியாகக் கான்கிரீட் கலவை இயந்திரத்தை ஏற்றிச் சென்ற டாடா சரக்கு வாகனம் வந்துள்ளது.

எதிர்பாராத விதமாக, வாகனத்தில் இருந்த கான்கிரீட் கலவை இயந்திரம் தனியாகக் கழன்று சென்று, மீன் விற்பனை செய்து கொண்டிருந்த செல்வராணி மீது மோதியதாகக் கூறப்படுகிறது.

இந்த விபத்தில் செல்வராணி பலத்த காயமடைந்தார். காயங்களின் தீவிரம் காரணமாக அவர் சம்பவ இடத்திலேயே உயிரிழந்தார்.

மக்கள் நடமாட்டம் உள்ள சாலையோரப் பகுதியில் நடைபெற்ற இந்தச் சம்பவம் அப்பகுதி மக்களிடையே அதிர்ச்சியையும் சோகத்தையும் ஏற்படுத்தியது.

விபத்து நிகழ்ந்ததும் சரக்கு வாகன ஓட்டுநர் அங்கிருந்து தப்பிச் சென்றதாகத் தெரிவிக்கப்படுகிறது.

விபத்து குறித்து தகவல் அறிந்த தொட்டியம் போலீசார் உடனடியாகச் சம்பவ இடத்திற்குச் சென்றனர்.

உயிரிழந்த செல்வராணியின் உடலை மீட்டு, பிரேதப் பரிசோதனைக்காக மருத்துவமனைக்கு அனுப்பி வைத்தனர்.

மேலும், விபத்து தொடர்பான சிசிடிவி காட்சிகளை போலீசார் கைப்பற்றி ஆய்வு செய்து வருகின்றனர்.

தப்பிச் சென்ற சரக்கு வாகன ஓட்டுநர் யார், விபத்து எவ்வாறு நிகழ்ந்தது, கான்கிரீட் கலவை இயந்திரம் கழன்று விழுந்ததற்கான காரணம் என்ன என்பது குறித்து விசாரணை நடைபெற்று வருகிறது.

சாலையோரம் வியாபாரம் செய்து கொண்டிருந்த பெண் உயிரிழந்த சம்பவம் தொட்டியம் பகுதியில் பெரும் சோகத்தை ஏற்படுத்தியுள்ளது.

Hindusthan Samachar / LOGESHWARI V