திருச்செந்தூர், 13 அக்டோபர் (ஹி.ச.)

வாக்காளர் பட்டியல் திருத்தப் பணிகள் மற்றும் வாக்குரிமை தொடர்பான விவகாரங்களை முன்வைத்து, டெல்லியில் சிஐடியு மற்றும் சிபிஐ(எம்) கட்சிகளைச் சேர்ந்த இடதுசாரித் தலைவர்கள் போராட்டத்தில் ஈடுபட்டதாகத் தெரிவிக்கப்பட்டது.

சுமார் 13 கோடி வாக்காளர்களின் வாக்குரிமை பறிக்கப்பட்டதாகக் குற்றம்சாட்டிய போராட்டக்காரர்கள், இதற்குப் பொறுப்பேற்று தலைமைத் தேர்தல் ஆணையர் ஞானேஷ்குமார் பதவி விலக வேண்டும் என வலியுறுத்தி போராட்டத்தில் ஈடுபட்டு வருகின்றனர்.

இந்தப் போராட்டத்தின்போது இடதுசாரித் தலைவர்கள் மீது தாக்குதல் நடத்தப்பட்டதாகவும், சிலர் கைது செய்யப்பட்டதாகவும் கூறப்படும் சம்பவங்களுக்கு எதிர்ப்பு தெரிவிக்கும் வகையில் திருச்செந்தூரில் ஆர்ப்பாட்டம் நடைபெற்றது.

இதில் பங்கேற்றவர்கள், ஜனநாயக உரிமைகளையும் வாக்குரிமையையும் பாதுகாக்க வேண்டும் என வலியுறுத்தினர்.

இந்த ஆர்ப்பாட்டத்துக்கு சிஐடியு மாவட்டத் துணைச் செயலாளர் குன்னி மலையான் தலைமை வகித்தார். சிஐடியு மாவட்டத் தலைவர் பேச்சிமுத்து, மாவட்டத் துணைத் தலைவர் சந்திரா, மாவட்டத் துணைச் செயலாளர்கள் அந்தோணி நிக்ஸன், ராமய்யா ஆகியோர் கலந்து கொண்டனர்.

மேலும், சிபிஐ(எம்) திருச்செந்தூர் ஒன்றியச் செயலாளர் முத்துக்குமார், ஆழ்வார் ஒன்றியச் செயலாளர் ரவிச்சந்திரன், அகில இந்திய விவசாயத் தொழிலாளர் சங்கத்தின் மாவட்ட நிர்வாகி பன்னீர்செல்வம், மின்சார ஓய்வூதியர் சங்கத் தலைவர் ஜெயபாண்டியன் ஆகியோரும் பங்கேற்றனர்.

சிஐடியு மாவட்டக் குழு உறுப்பினர்கள் ஜெபராணி, ஹேமலதா, துரைராஜ், ஸ்டேன்லி உள்ளிட்ட ஏராளமானோர் ஆர்ப்பாட்டத்தில் கலந்து கொண்டனர்.

டெல்லியில் நடைபெற்றதாகக் கூறப்படும் தாக்குதல் மற்றும் கைது நடவடிக்கைகளுக்கு எதிராகக் கண்டன முழக்கங்கள் எழுப்பப்பட்டன.

Hindusthan Samachar / LOGESHWARI V