புதுடெல்லி, 16 அக்டோபர் (ஹி.ச.)

டில்லியில் அக்டோபர் 10 மற்றும் 11 ஆகிய தேதிகளில் நடைபெற்ற போராட்டங்களின்போது பத்திரிகையாளர்கள் தாக்கப்பட்டதாகக் கூறி, உச்ச நீதிமன்றத்தில் மனு தாக்கல் செய்யப்பட்டது.

இந்த வழக்கைத் தலைமை நீதிபதி சூர்ய காந்த் மற்றும் நீதிபதி ஜாய்மால்யா பாக்சி ஆகியோர் அடங்கிய அமர்வு விசாரித்தது.

விசாரணையின்போது, போராட்டங்கள் தொடர்பாகச் செய்தி சேகரித்த சுயாதீனப் பத்திரிகையாளர்களை டில்லி போலீசார் அங்கீகரிக்கவில்லை என மூத்த வழக்கறிஞர் இந்திரா ஜெய்சிங் தெரிவித்தார்.

மேலும், அடையாள அட்டை வைத்திருக்கும் பத்திரிகையாளர்கள் தங்களது பணியை மேற்கொள்ளும்போது போலீசார் இடையூறு செய்யக்கூடாது என்றும், பத்திரிகையாளர்களின் பாதுகாப்பை உறுதி செய்ய நாடு முழுவதும் பின்பற்றக்கூடிய தேசிய அளவிலான வழிகாட்டுதல்கள் உருவாக்கப்பட வேண்டும் என்றும் அவர் வலியுறுத்தினார்.

இந்த விவகாரம் குறித்துக் கருத்து தெரிவித்த நீதிபதிகள், கருத்துச் சுதந்திரத்தைப் பயன்படுத்தி அனைவரும் தங்களைப் பத்திரிகையாளர்கள் எனக் கூறிக்கொள்ளும் சூழலில் நடைமுறைச் சிக்கல்கள் எழுவதாகக் குறிப்பிட்டனர்.

அங்கீகரிக்கப்பட்ட ஊடக நிறுவனங்களில் பணிபுரியும் செய்தியாளர்களை அடையாளம் கண்டு அவர்களுக்குப் பாதுகாப்பு வழங்குவது அரசுக்கு சவாலாக மாறக்கூடும் என்றும் நீதிபதிகள் தெரிவித்தனர்.

அதேபோல், பாரம்பரிய ஊடகங்களில் பணியாற்றும் அங்கீகரிக்கப்பட்ட பத்திரிகையாளர்களையும், டிஜிட்டல் தளங்களில் செய்திகளை வெளியிடும் நபர்களையும் வேறுபடுத்தி அடையாளம் காண்பதில் சிரமங்கள் இருப்பதாகவும் அவர்கள் சுட்டிக்காட்டினர்.

பத்திரிகையாளர்கள் மீதான தாக்குதல் தொடர்பாகச் சில போலீஸ் அதிகாரிகளுக்கு எதிராகக் குறிப்பிட்ட குற்றச்சாட்டுகள் முன்வைக்கப்பட்டுள்ளன.

இந்தப் புகார்களை விசாரிக்கச் சுதந்திரமான விசாரணை அமைப்பை நியமிப்பது குறித்து நீதிமன்றம் பரிசீலித்து வருவதாகவும் தெரிவிக்கப்பட்டது.

இதற்கிடையில், வழக்கறிஞர்கள் மீதான தாக்குதல்கள் தொடர்பாகத் தாக்கல் செய்யப்பட்ட நான்கு மனுக்கள் குறித்தும் நீதிமன்றம் குறிப்பிட்டது.

இந்த மனுக்கள் தொடர்பாகப் பதிலளிக்குமாறு சம்பந்தப்பட்ட அதிகாரிகளுக்கு நோட்டீஸ் அனுப்பப்பட்டுள்ளதாக நீதிபதிகள் தெரிவித்தனர்.

Hindusthan Samachar / LOGESHWARI V