கொல்கத்தா, 18 அக்டோபர் (ஹி.ச.)

கொல்கத்தாவின் கிரிஷ் பார்க் காவல் நிலைய எல்லைக்குட்பட்ட சோர்பாகன் சர்வஜனின் துர்கா பூஜை பந்தலில், அக்டோபர் 17-ம் தேதி சனிக்கிழமை இரவு சுமார் 7.40 மணியளவில் இந்த விபத்து நிகழ்ந்தது.

துர்கா பூஜாவைக் காண ஏராளமான மக்கள் அங்கு திரண்டிருந்த நிலையில், திடீரெனப் பெய்த கனமழை மற்றும் மின்னல் காரணமாகப் பரபரப்பு ஏற்பட்டது.

மழையிலிருந்து தப்பிக்க வெளியில் காத்திருந்தவர்கள் பந்தலுக்குள் செல்ல முயன்றதாகவும், அதே நேரத்தில் உள்ளே இருந்தவர்கள் வெளியேற முயன்றதால் நுழைவு மற்றும் வெளியேறும் பகுதிகளில் நெரிசல் அதிகரித்ததாகவும் முதற்கட்டத் தகவல்கள் தெரிவிக்கின்றன.

இதில் சிலர் கீழே விழுந்ததால், அடுத்தடுத்து மக்கள் ஒருவர் மீது ஒருவர் விழுந்து சிக்கிக்கொண்டனர்.

தகவலறிந்து சம்பவ இடத்திற்கு விரைந்த காவல்துறையினர், தீயணைப்புப் படையினர் மற்றும் பேரிடர் மீட்புக் குழுவினர் மீட்புப் பணியில் ஈடுபட்டனர்.

காயமடைந்தவர்கள் கொல்கத்தா மருத்துவக் கல்லூரி மருத்துவமனை உள்ளிட்ட மருத்துவமனைகளுக்குக் கொண்டு செல்லப்பட்டனர்.

ஏற்கனவே 17 பேர் உயிர் இழந்த நிலையில் பலி எண்ணிக்கை இன்று 19 ஆக அதிகரித்துள்ளது. மேலும் 25 பேர் காயம் அடைந்துள்ளனர்.

விபத்தைத் தொடர்ந்து, பந்தல் பொதுமக்களின் பார்வைக்காக மூடப்பட்டது. கூட்டத்தைக் கட்டுப்படுத்துவதில் குறைபாடுகள் இருந்தனவா, பாதுகாப்பு ஏற்பாடுகள் முறையாகச் செய்யப்பட்டிருந்தனவா என்பது குறித்து காவல்துறையினர் விசாரணை மேற்கொண்டு வருகின்றனர்.

இந்தச் சம்பவம் தொடர்பாகப் பந்தல் ஏற்பாட்டுக் குழுவைச் சேர்ந்தவர்கள் உள்ளிட்ட 7 பேர் கைது செய்யப்பட்டுள்ளதாகத் தகவல் வெளியாகியுள்ளது.

மேலும், சம்பவத்தின் பின்னணி மற்றும் பாதுகாப்பு ஏற்பாடுகளில் ஏற்பட்டிருக்கக்கூடிய குறைபாடுகளை ஆராய சிறப்புப் புலனாய்வுக் குழு அமைக்கப்பட்டுள்ளது.

உயிரிழந்தவர்களின் குடும்பங்களுக்கு பிரதமரின் தேசிய நிவாரண நிதியிலிருந்து தலா ரூ.2 லட்சமும், காயமடைந்தவர்களுக்கு தலா ரூ.50 ஆயிரமும் வழங்கப்படும் எனப் பிரதமர் நரேந்திர மோடி அறிவித்துள்ளார்.

மேலும், பாதிக்கப்பட்ட குடும்பங்களுக்கு உதவுவதற்கும், காயமடைந்தவர்களுக்கு உரிய சிகிச்சை அளிப்பதற்கும் மாநில அரசு நடவடிக்கை மேற்கொண்டு வருகிறது.

Hindusthan Samachar / LOGESHWARI V