புதுடெல்லி, 19 அக்டோபர் (ஹி.ச.)

டெல்லியில் தூய்மை இயக்கம் 6.0 குறித்துப் பேசிய மத்திய அமைச்சர் டாக்டர் ஜிதேந்திர சிங், கடந்த 5 ஆண்டுகளில் பழைய பொருட்கள் மற்றும் கழிவுகளைச் சேகரித்து விற்பனை செய்ததன் மூலம் அரசுக்கு சுமார் ரூ.6,000 கோடி அல்லது அதற்கும் அதிகமான வருவாய் கிடைத்துள்ளதாகத் தெரிவித்தார்.

இதுகுறித்து செய்தியாளர்களிடம் பேசிய அவர்,

2014-ஆம் ஆண்டு பிரதமராகப் பொறுப்பேற்ற சிறிது காலத்திலேயே, செங்கோட்டையில் இருந்து பிரதமர் நரேந்திர மோடி இந்தத் தூய்மை இயக்கத்தைத் தொடங்கினார்.

விரைவிலேயே இது மக்கள் இயக்கமாக மாறியது.

ஒவ்வொரு ஆண்டும் முந்தைய அனுபவங்களின் அடிப்படையில் இந்த இயக்கத்தைத் தொடர்ந்து முன்னெடுத்து வருகிறோம்.

சுமார் 6 ஆண்டுகளுக்கு முன்பு, ஒரு மாத காலத்திற்கு சிறப்பு தூய்மைப் பணி இயக்கத்தை நடத்த முடிவு செய்யப்பட்டது.

அதன்படி, மகாத்மா காந்தி பிறந்த நாளான அக்டோபர் 2-ஆம் தேதி முதல் சர்தார் வல்லபாய் படேல் பிறந்த நாளான அக்டோபர் 31-ஆம் தேதி வரை இந்த இயக்கம் நடத்தப்பட்டு வருகிறது. கடந்த ஆறு ஆண்டுகளாக இந்த நடைமுறை பின்பற்றப்படுகிறது.

இந்த ஆண்டு தூய்மை இயக்கத்தின் 6-வது பதிப்பான ‘ஸ்வச்சதா இயக்கம் 6.0’ நடைபெறுகிறது. இந்த முன்னெடுப்பு அவ்வப்போது மதிப்பீடு செய்யப்படுகிறது.

முந்தைய ஆண்டுகளின் அனுபவங்களிலிருந்து கிடைக்கும் பாடங்களின் அடிப்படையில், புதிய அம்சங்களும் இந்த இயக்கத்தில் சேர்க்கப்படுகின்றன.

கழிவுகளை எவ்வாறு திறம்பட மேலாண்மை செய்வது என்பதையும், அவை வீணாகாமல் சந்தைக்குக் கொண்டு செல்லப்பட்டு வருவாயாக மாற்றப்படுவது எப்படி என்பதையும் நாம் கற்றுக்கொண்டுள்ளோம்.

கடந்த 5 ஆண்டுகளில், பழைய பொருட்கள் மற்றும் கழிவுகளைச் சேகரித்து விற்பனை செய்ததன் மூலம் அரசின் கருவூலத்திற்கு சுமார் ரூ.6,000 கோடி அல்லது அதற்கும் அதிகமான தொகையை வருவாயாக வழங்கியுள்ளதாக மத்திய அமைச்சர் டாக்டர் ஜிதேந்திர சிங் தெரிவித்தார்.

Hindusthan Samachar / LOGESHWARI V