திருவனந்தபுரம், 23 அக்டோபர் (ஹி.ச.)

கேரள மாநிலத்தில் கனமழை பெய்ய வாய்ப்புள்ளதால், இன்று ஒன்பது மாவட்டங்களுக்கு ஆரஞ்சு அலர்ட்டும், ஐந்து மாவட்டங்களுக்கு மஞ்சள் அலர்ட்டும் இந்திய வானிலை ஆய்வு மையம் விடுத்துள்ளது.

தொடர்ந்து மழை பெய்யக்கூடும் என்பதால், பொதுமக்கள் எச்சரிக்கையுடன் இருக்குமாறு அறிவுறுத்தப்பட்டுள்ளனர்.

திருவனந்தபுரம், கொல்லம், பத்தனம்திட்டா, கோட்டயம், இடுக்கி, கோழிக்கோடு, வயநாடு, கண்ணூர், காசர்கோடு ஆகிய ஒன்பது மாவட்டங்களில் இன்று ஆரஞ்சு அலர்ட் அமலில் உள்ளது.

இந்த மாவட்டங்களில் ஓரிரு இடங்களில் மிக கனமழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது.

ஆரஞ்சு அலர்ட் என்பது அடுத்த 24 மணி நேரத்தில் குறிப்பிட்ட பகுதிகளில் 115.6 மி.மீ. முதல் 204.4 மி.மீ. வரை மழை பெய்யக்கூடும் என்பதைக் குறிக்கிறது.

ஆலப்புழா, எர்ணாகுளம், திருச்சூர், பாலக்காடு, மலப்புரம் ஆகிய ஐந்து மாவட்டங்களுக்கு மஞ்சள் அலர்ட் விடுக்கப்பட்டுள்ளது.

இந்த மாவட்டங்களில் கனமழை பெய்ய வாய்ப்புள்ளதால், பொதுமக்கள் வானிலை முன்னறிவிப்புகளைத் தொடர்ந்து கவனிக்க வேண்டும்.

மஞ்சள் அலர்ட் என்பது 24 மணி நேரத்தில் 64.5 மி.மீ. முதல் 115.5 மி.மீ. வரை மழை பெய்யக்கூடிய சூழலைக் குறிக்கிறது. மழையின் தீவிரம் மற்றும் உள்ளூர் நிலவரங்களுக்கு ஏற்ப எச்சரிக்கைகளில் மாற்றங்கள் ஏற்படலாம்.

தொடர்ந்து கனமழை பெய்யும் பட்சத்தில் தாழ்வான பகுதிகளில் தண்ணீர் தேங்குவதுடன், ஆறுகள் மற்றும் நீரோடைகளில் நீர்வரத்து அதிகரிக்கக்கூடும். மலைப்பகுதிகளில் மண் சரிவு மற்றும் நிலச்சரிவு ஏற்படும் அபாயமும் உள்ளது.

எனவே, வெள்ளம் மற்றும் நிலச்சரிவு அபாயம் உள்ள பகுதிகளில் வசிப்பவர்கள் அதிகாரிகளின் அறிவுறுத்தல்களைப் பின்பற்ற வேண்டும் என்றும் ஆறுகள், நீர்நிலைகள், அருவிகள் மற்றும் மலைப்பகுதிகளுக்குச் செல்வதைத் தவிர்ப்பது பாதுகாப்பானது என அறிவுறுத்தப்பட்டுள்ளது.

கனமழையின்போது தேவையற்ற பயணங்களைத் தவிர்க்கவும், மின்கம்பங்கள், மரங்கள் மற்றும் சேதமடைந்த கட்டடங்களுக்கு அருகில் நிற்பதைத் தவிர்க்கவும் அறிவுறுத்தப்படுகிறது.

Hindusthan Samachar / LOGESHWARI V