புதுடெல்லி, 25 அக்டோபர் (ஹி.ச.)

ஐக்கிய நாடுகள் தினத்தை முன்னிட்டு, டெல்லியில் நடைபெற்ற சின்மயா அம்ரித் மஹோத்சவ் உலகளாவிய மாநாட்டில் பங்கேற்ற இந்திய வெளியுறவுத்துறை அமைச்சர் டாக்டர் எஸ். ஜெய்சங்கர், உலக அமைதி, சர்வதேச ஒத்துழைப்பு, பயங்கரவாத ஒழிப்பு, பொருளாதார முன்னேற்றம் மற்றும் செயற்கை நுண்ணறிவின் பயன்பாடு உள்ளிட்ட பல்வேறு விவகாரங்கள் குறித்து பேசினார்.

அப்போது பேசிய அவர், போட்டித்தன்மைக்கு முக்கியத்துவம் அளிப்பவர்களுக்கும், ஒத்துழைப்பில் நன்மை இருப்பதாகக் கருதுபவர்களுக்கும் இடையே மனிதகுலம் தொடர்ந்து விவாதங்களைச் சந்தித்து வருவதாகக் குறிப்பிட்டார்.

தனிநபர்கள் மற்றும் சமூகங்களிடையே காணப்படும் இந்த முரண்பாடுகள், சர்வதேச அளவில் நாடுகள் ஒன்றுக்கொன்று எவ்வாறு நடந்துகொள்கின்றன என்பதிலும் பிரதிபலிக்கின்றன என்றார்.

எட்டு தசாப்தங்களுக்கு முன்பு ஐக்கிய நாடுகள் சபை உருவாக்கப்பட்டபோது, உலக நாடுகளின் கூட்டு முயற்சியும் ஒத்துழைப்பும் முக்கியத்துவம் பெற்றதாகக் குறிப்பிட்ட அவர்,

பொதுவான இலக்குகளை அடைவதற்காக நாடுகளின் செயல்பாடுகளை ஒருங்கிணைக்கும் மையமாக ஐ.நா. செயல்பட வேண்டும் என்று அதன் சாசனத்தின் முதல் பிரிவு வலியுறுத்துவதாகத் தெரிவித்தார்.

உலகம் எதிர்கொள்ளும் சவால்களையும் வாய்ப்புகளையும் தனித்தனியாகச் செயல்படுவதைக் காட்டிலும், ஒன்றிணைந்து செயல்படுவதன் மூலம் சிறப்பாக எதிர்கொள்ள முடியும் என்றும் அவர் கூறினார்.

தற்போது உலகம் உக்ரைன் மற்றும் மேற்கு ஆசியா எனப்படும் மத்திய கிழக்குப் பகுதிகளில் இரண்டு முக்கிய மோதல்களை எதிர்கொண்டு வருவதாக ஜெய்சங்கர் தெரிவித்தார்.

இந்த மோதல்களுடன் நேரடித் தொடர்பில்லாத தொலைதூரப் பகுதிகளில் வாழும் மக்களும், சமூகங்களும், பொருளாதாரங்களும் அதன் பாதிப்புகளைச் சந்தித்து வருவதாகக் குறிப்பிட்டார். எனவே, உலக நாடுகள் இதனை வேடிக்கை பார்த்துக்கொண்டிருக்க முடியாது என்றார்.

பேச்சுவார்த்தையும் ராஜதந்திர நடவடிக்கைகளுமே மோதல்களுக்குத் தீர்வு காண்பதற்கான ஒரே வழி என்ற உலக மக்களின் கருத்தை இந்தியா பிரதிபலிப்பதாகவும், இந்த நோக்கத்தை அடைய இந்தியா தொடர்ந்து முயற்சிகளை மேற்கொண்டு வருவதாகவும் அவர் கூறினார்.

இதற்காக மற்ற நாடுகளுடன் இணைந்து செயல்படவும் இந்தியா தயாராக இருப்பதாகத் தெரிவித்தார்.

உலக அமைதிக்கு மற்றொரு மிகப்பெரிய அச்சுறுத்தலாகப் பயங்கரவாதம் இருப்பதாக ஜெய்சங்கர் எச்சரித்தார்.

அரசின் கொள்கை அல்லது செயல்பாட்டுக் கருவியாகப் பயங்கரவாதத்தைப் பயன்படுத்துவது முற்றிலும் ஏற்றுக்கொள்ள முடியாதது என்றும், அதனை எந்தச் சூழலிலும் நியாயப்படுத்தவோ, அதற்கான காரணங்களை முன்வைக்கவோ முடியாது என்றும் தெரிவித்தார்.

சில நாடுகள் பயங்கரவாதத்துக்கு எதிராக முழுமையான சகிப்புத்தன்மையற்ற கொள்கையைக் கடைப்பிடிக்காததே இந்தப் பிரச்சினை தொடர்வதற்குக் காரணம் எனக் குறிப்பிட்டார்.

வரலாறு பல பாடங்களைக் கற்றுக்கொடுத்திருந்தாலும், சில நாடுகள் அரசியல் நலன்களுக்கு முன்னுரிமை அளிப்பதாகவும் சுட்டிக்காட்டினார்.

எனவே, பயங்கரவாதம் என்பது உலக நாடுகள் அனைத்தும் ஒன்றிணைந்து எதிர்கொள்ள வேண்டிய பொதுவான அச்சுறுத்தல் என்பதை உணர்ந்து, அதன் அனைத்து வடிவங்களுக்கும் எதிராக வலுவான நடவடிக்கைகளை மேற்கொள்ள வேண்டும் என்று அவர் வலியுறுத்தினார்.

மோதல்களும் வன்முறைகளும் உலகின் முன்னேற்றத்தைப் பாதிக்கும் அதே வேளையில், வளர்ச்சியும் செழிப்பும் அனைத்து நாடுகளுக்கும் பொதுவானதாக இருக்க வேண்டும் என்று ஜெய்சங்கர் தெரிவித்தார்.

உலகளாவிய விநியோகச் சங்கிலிகள், சர்வதேசச் சந்தைகள் மற்றும் பொதுவான வளங்கள் ஒன்றோடொன்று இணைந்துள்ள தற்போதைய சூழலில், சில நாடுகள் மட்டும் செழிப்பாகவும், மற்ற நாடுகள் வளர்ச்சி வாய்ப்புகள் மறுக்கப்பட்ட நிலையிலும் இருக்க முடியாது என்றார். இத்தகைய ஏற்றத்தாழ்வுகள் தொடர்ந்து நிலையற்ற தன்மையை உருவாக்கும் என்றும் குறிப்பிட்டார்.

உலகின் தெற்குப் பகுதி நாடுகள் தற்போது நிதி, எரிபொருள், உணவு மற்றும் உரம் ஆகிய நான்கு முக்கியத் துறைகளில் நெருக்கடியை எதிர்கொள்வதாகத் தெரிவித்தார்.

இந்தச் சவால்களுக்குத் தீர்வு காண்பதில் வளர்ந்த நாடுகளுக்கும் சமமான பொறுப்பும் அக்கறையும் இருப்பதை உலகின் வடக்குப் பகுதி நாடுகள் உணர வேண்டும் என்றார்.

சர்வதேசப் பொருளாதாரத்தில் உள்ள அபாயங்களைக் குறைத்து, நாடுகள் தங்களுக்கான மாற்று வாய்ப்புகளை அதிகரிக்க வேண்டும் என்றும் வலியுறுத்தினார்.

சந்தைகளில் ஏற்படுத்தப்படும் செயற்கையான தடைகளும், விநியோகப் பாதைகளில் உருவாக்கப்படும் இடையூறுகளும் மக்களின் துயரத்தை அதிகரிப்பதாகக் கூறினார். இத்தகைய பிரச்சினைகள் குறித்து நாடுகளிடையே உண்மையான பேச்சுவார்த்தை நடைபெற வேண்டியது அவசியம் என்றும் தெரிவித்தார்.

தொழில்நுட்ப வளர்ச்சியுடன் முன்னேற்றம் நெருக்கமாகத் தொடர்புடையது என்று குறிப்பிட்ட ஜெய்சங்கர், செயற்கை நுண்ணறிவு உலகில் மிகப்பெரிய மாற்றத்தை ஏற்படுத்தும் ஆற்றலைக் கொண்டுள்ளதாகத் தெரிவித்தார்.

இத்தகைய விரிவான தாக்கத்தை ஏற்படுத்தக்கூடிய தொழில்நுட்பத்தை ஒரு சிலரின் கட்டுப்பாட்டில் மட்டும் விட்டுவிட முடியாது என்றார்.

கடந்த 80 ஆண்டுகளில் உலகம் கண்டுள்ள சுதந்திரம் மற்றும் ஜனநாயகமயமாக்கல் வளர்ச்சிக்கு இது முரணாக அமையும் என்றும் குறிப்பிட்டார்.

இதனால், பொறுப்பான, அனைவரையும் உள்ளடக்கிய மற்றும் மனிதர்களை மையமாகக் கொண்ட செயற்கை நுண்ணறிவுப் பயன்பாட்டை இந்தியா வலுவாக ஆதரிப்பதாகத் தெரிவித்தார்.

செயற்கை நுண்ணறிவு உலக மக்கள் அனைவருக்கும் பயன்படக்கூடியது என்பதையும், அதனைப் பற்றிய விரிவான கண்ணோட்டம் அவசியம் என்பதையும் இந்தியா வலியுறுத்துவதாகக் கூறினார்.

கொரோனா பெருந்தொற்று காலத்தில், இந்தியாவில் தடுப்பூசி செலுத்தும் பணி தொடர்ந்து நடைபெற்றுக்கொண்டிருந்தபோதிலும், உதவி கிடைக்காமல் பின்தங்கியிருக்கக்கூடிய பிற நாடுகளுக்கும் தடுப்பூசிகளை வழங்க இந்தியா முடிவு செய்ததை ஜெய்சங்கர் சுட்டிக்காட்டினார்.

தற்போது 78 நாடுகளில் இந்தியாவின் வளர்ச்சிக் கூட்டாண்மைத் திட்டங்கள் செயல்பட்டு வருவதாகவும், நூற்றுக்கணக்கான திட்டங்கள் மூலம் பல்வேறு நாடுகளுக்கு உதவி வழங்கப்படுவதாகவும் தெரிவித்தார்.

இந்தியா தனது தேசிய வளர்ச்சி இலக்குகளை அடைவதற்கான முயற்சிகளை மேற்கொண்டு வரும் அதே நேரத்தில், பிற நாடுகளின் திறன் மேம்பாட்டிற்கும் பயிற்சிக்கும் வாய்ப்புகளை வழங்கி வருவதாகக் குறிப்பிட்டார்.

நேபாளம், இலங்கை மட்டுமின்றி வெனிசுலா, ஜமைக்கா உள்ளிட்ட நாடுகளிலும் அவசர காலங்களில் உதவி வழங்குவதன் மூலம் இந்தியா தனது மனிதாபிமான அணுகுமுறையை வெளிப்படுத்தி வருவதாகக் கூறினார்.

'வசுதைவ குடும்பகம்' — உலகமே ஒரே குடும்பம் என்ற இந்தியாவின் கொள்கை வெறும் வார்த்தைகளில் மட்டுமின்றி, நடைமுறையிலும் பின்பற்றப்பட்டு வருவதாக அவர் தெரிவித்தார்.

உலகம் இன்னும் முழுமையான நிலையை எட்டவில்லை என்றாலும், தொடர்ந்து முன்னேற்றத்தை நோக்கிப் பயணித்து வருவதாக ஜெய்சங்கர் தெரிவித்தார்.

ஐக்கிய நாடுகள் சபையைப் பொறுத்தவரையில், அதன் குறைபாடுகளையும் வரம்புகளையும் உணர்ந்து, அவற்றைச் சரிசெய்வதற்கான நடவடிக்கைகளை மேற்கொள்ள வேண்டியது அவசியம் என்றார்.

சர்வதேச அமைப்புகளில் சீர்திருத்தங்களை மேற்கொண்டு, பலதரப்பு ஒத்துழைப்பை வலுப்படுத்த வேண்டியதன் அவசியம் நாளுக்கு நாள் அதிகரித்து வருவதாகக் குறிப்பிட்டார்.

உலகின் பல பகுதிகளைச் சேர்ந்த நாடுகளை முடிவெடுக்கும் செயல்முறையிலிருந்து தொடர்ந்து விலக்கி வைக்க முடியாது என்றும் தெரிவித்தார்.

உலகளாவிய நெருக்கடிகளின்போது பார்வையாளராக மட்டும் இல்லாமல், ஐக்கிய நாடுகள் சபை தலைமைப் பொறுப்புடன் செயல்பட வேண்டும் என்றும் வலியுறுத்தினார்.

நீண்டகாலமாக எதிர்பார்க்கப்படும் சீர்திருத்தங்களின் அவசியத்தை உணர்ந்து, உலக நாடுகள் ஒன்றிணைந்து செயல்படுவதற்கான உறுதிப்பாட்டை மீண்டும் புதுப்பிக்க வேண்டும் என்று கூறிய அவர்,

மனிதகுலத்தின் நலன்கள் பொதுவானவை; நமது எதிர்காலம் ஒன்றோடொன்று இணைந்தது; நாம் அனைவரும் ஒற்றுமையுடன் செயல்பட வேண்டும் என்று தனது உரையில் வலியுறுத்தினார்.

Hindusthan Samachar / LOGESHWARI V