தேனி, 27 அக்டோபர் (ஹி.ச.)

தேனி மாவட்டம் கம்பம் அருகே, மேற்கு தொடர்ச்சி மலையின் அடிவாரத்தில் ஸ்ரீவில்லிபுத்தூர்–மேகமலை புலிகள் காப்பக வனப்பகுதியில் சுருளி அருவி அமைந்துள்ளது.

வனத்துறையின் கட்டுப்பாட்டில் உள்ள இந்த அருவி, சுற்றுலாத் தலமாக மட்டுமின்றி ஆன்மிக முக்கியத்துவம் வாய்ந்த இடமாகவும் விளங்குகிறது.

சுருளி அருவிக்கு தினமும் ஏராளமான சுற்றுலாப் பயணிகளும் பொதுமக்களும் வருகை தருகின்றனர். அருவியில் குளித்துவிட்டு, அருகிலுள்ள சிவாலயங்களில் சுவாமி தரிசனம் செய்வதைப் பலர் வழக்கமாகக் கொண்டுள்ளனர்.

இந்நிலையில், கடந்த சில நாட்களாக அருவியின் நீர்ப்பிடிப்புப் பகுதிகளில் வடகிழக்குப் பருவமழை தீவிரமடைந்துள்ளது. அரிசிப்பாறை, ஈத்தக்காடு, தூவானம் அணை, வெண்ணியாறு உள்ளிட்ட பகுதிகளிலும், சுருளி அருவியின் ஆற்றுப்படுகைப் பகுதிகளிலும் மழைப்பொழிவு அதிகரித்துள்ளது.

இதன் காரணமாக, அருவிக்கு நீரைக் கொண்டு வரும் ஆற்றில் வெள்ளப்பெருக்கு ஏற்பட்டுள்ளது. இதனால் சுருளி அருவியில் தண்ணீர் அதிக வேகத்துடன் ஆர்ப்பரித்துக் கொட்டுகிறது. நீர்வரத்து அதிகமாக இருப்பதால், அருவியில் குளிப்பது ஆபத்தை ஏற்படுத்தக்கூடும் எனக் கருதப்படுகிறது.

சுற்றுலாப் பயணிகளுக்கு எச்சரிக்கை:

வெள்ளப்பெருக்கால் ஏற்படக்கூடிய ஆபத்துகளைத் தவிர்க்கும் வகையில், சுருளி அருவியில் பொதுமக்களும் சுற்றுலாப் பயணிகளும் குளிப்பதற்கு வனத்துறையினர் தொடர்ந்து 9-வது நாளாகத் தடை விதித்துள்ளனர்.

மேலும், அருவிக்கு வரும் நீரின் அளவு சீராகும் வரை சுற்றுலாப் பயணிகள் அருவிப் பகுதிக்கு வர வேண்டாம் என்றும் வனத்துறையினர் அறிவுறுத்தியுள்ளனர்.

நீர்வரத்து இயல்பு நிலைக்குத் திரும்பிய பின்னரே சுற்றுலாப் பயணிகள் அனுமதிக்கப்படுவது தொடர்பாக முடிவு எடுக்கப்படும் என எதிர்பார்க்கப்படுகிறது.

இதற்கிடையே, அருவியில் குளிப்பதற்காக வந்த ஏராளமான சுற்றுலாப் பயணிகள், தடை காரணமாக ஏமாற்றத்துடன் திரும்பிச் செல்கின்றனர்.

Hindusthan Samachar / LOGESHWARI V