புதுடெல்லி, 28 அக்டோபர் (ஹி.ச.)

இந்தியா கூட்டணி சார்பில் நவம்பர் 1-ஆம் தேதி டெல்லி ராம்லீலா மைதானத்தில் பிரம்மாண்டப் பேரணி நடைபெற உள்ள நிலையில், தலைமைத் தேர்தல் ஆணையர் ஞானேஷ் குமாருக்கு எதிராகப் பொதுமக்கள் முன்னிலையில் அடையாள பதவி நீக்க நடவடிக்கை நடத்தப்படும் என்று காங்கிரஸ் எம்.பி. ஜெபி மாதர் தெரிவித்துள்ளார்.

இதுகுறித்து செய்தியாளர்களிடம் பேசிய அவர்,

ஏற்கெனவே பல்வேறு கட்டங்களாகப் போராட்டங்கள் நடைபெற்றுள்ளன. இதன் தொடர்ச்சியாக, நவம்பர் 1-ஆம் தேதி ராம்லீலா மைதானத்தில் மிகப்பெரிய பேரணி நடைபெற உள்ளது.

அதற்கு முன்னோட்டமாக, தலைமைத் தேர்தல் ஆணையர் ஞானேஷ் குமாருக்கு எதிராகப் பொதுமக்கள் முன்னிலையில் அடையாளப் பதவி நீக்க நடவடிக்கை மேற்கொள்ளப்படுவதாக மீண்டும் வலுவான செய்தியை வெளிப்படுத்த விரும்புகிறோம்.

ஞானேஷ் குமார் இவ்வளவு எளிதாகப் பொறுப்பிலிருந்து தப்பித்துவிட முடியாது. அவருக்கு எதிராக உண்மைகள் முன்வைக்கப்படும்; ஆதாரங்கள் வெளியிடப்படும்; விசாரணைகளும் நடைபெறும்.

ஜனநாயகத்தில் தலைமைத் தேர்தல் ஆணையர் தனது நேர்மையை இழந்துவிட்டால், அவர் அந்தப் பதவியில் தொடர்ந்து நீடிக்கக் கூடாது. ஆனால், ஞானேஷ் குமார் தொடர்ந்து அந்தப் பதவியில் நீடிக்க முயற்சிக்கிறார்.

எனவே, அவருக்கு எதிராகப் பொதுமக்கள் முன்னிலையில் அடையாளப்பூர்வமான பதவி நீக்க நடவடிக்கையை மேற்கொள்ள உள்ளோம். சட்டரீதியாக அல்லாமல் அடையாளப்பூர்வமாக மட்டுமே இதைச் செய்ய முடியும். இருப்பினும், இது மக்களின் மனநிலையைப் பிரதிபலிக்கும் நடவடிக்கையாக இருக்கும்.

ஞானேஷ் குமார் பதவியில் இருந்து நீக்கப்பட வேண்டும் என்பதே நாட்டின் மக்களின் மனநிலையாக உள்ளது என்பதை இந்த நடவடிக்கையின் மூலம் வெளிப்படுத்த விரும்புகிறோம்” என்று ஜெபி மாதர் தெரிவித்தார்.

ராகுல் காந்தியின் பேரணிக்கு எதிராக வணிகர்கள் நடத்தும் பேரணியில் பாஜக தலைவர்கள் பங்கேற்க உள்ளதாகக் கூறப்படுவது குறித்துக் கருத்து தெரிவித்த ஜெபி மாதர், பாஜக தேசியத் தலைவரும் ஞானேஷ் குமாரைப் பாதுகாப்பதற்காக வீதிக்கு இறங்குவதாகக் குற்றம்சாட்டினார்.

பாஜக தேசியத் தலைவரும் தற்போது ஞானேஷ் குமாரைப் பாதுகாப்பதற்காக வீதிக்கு இறங்குகிறார். உண்மையிலேயே அவர்கள் ஜனநாயகத்தைப் பாதுகாக்க விரும்பினால், ‘ஜனநாயகத்தைக் காப்பாற்றுங்கள், ஞானேஷ் குமாரைப் பதவியில் இருந்து நீக்குங்கள்’ என்பதுதான் அவர்களின் முழக்கமாக இருக்க வேண்டும்.

ஆனால், அவர்களின் உண்மையான நோக்கம் ஞானேஷ் குமாரைப் பாதுகாப்பதுதான் என்று அவர் விமர்சித்தார்.

Hindusthan Samachar / LOGESHWARI V