சென்னை, 03 அக்டோபர் (ஹி.ச.)

தி.நகரில் சிலம்புச் செல்வர் மா.பொ.சி.யின் 31-வது நினைவு நாளையொட்டி அவரது சிலைக்கு தமிழிசை சௌந்தரராஜன் மலர்தூவி மரியாதை செலுத்தினார்.

பின்னர் செய்தியாளர்களைச் சந்தித்த அவர்,

மா.பொ.சி.யின் பங்களிப்புகள் மற்றும் தமிழகத்திற்கான அவரது போராட்டங்களை நினைவுகூர்ந்தார்.

மா.பொ.சி.யின் எல்லைப் போராட்டம் முக்கியத்துவம் வாய்ந்தது என்றும், சென்னை மற்றும் திருத்தணியில் அவருக்கு நினைவுச் சின்னங்கள் அமைக்க வேண்டும் என்றும் தமிழிசை சௌந்தரராஜன் வலியுறுத்தினார்.

தொடர்ந்து தாராபுரம் இடைத்தேர்தல் பிரசாரம் குறித்து பேசிய அவர், தவெக வேட்பாளர் சத்தியபாமா குறித்து திமுக தலைவர் மு.க.ஸ்டாலின் தெரிவித்த கருத்துகளுக்கு கண்டனம் தெரிவித்தார்.

அரசியல் தலைவர்கள் பிரசாரத்தின்போது பெண்கள் குறித்து பேசும்போது கவனமாக இருக்க வேண்டும் என்றும் அவர் கேட்டுக்கொண்டார்.

இந்த விவகாரம் தொடர்பாக தவெக தரப்பிலும் ஸ்டாலினின் பேச்சுக்கு எதிர்ப்பு தெரிவிக்கப்பட்டுள்ளது. ஸ்டாலின் பிரசாரத்தில் சத்தியபாமா குறித்து குறிப்பிட்ட சொற்கள் சர்ச்சையை ஏற்படுத்தியதாகவும், அது தனிப்பட்ட விமர்சனமாக அமைந்ததாகவும் தவெக நிர்வாகிகள் தெரிவித்துள்ளனர்.

சென்னையில் நடைபெறும் காங்கிரஸ் தலைமையிலான கூட்டணி கட்சிகளின் ஆலோசனைக் கூட்டம் குறித்தும் தமிழிசை சௌந்தரராஜன் கருத்து தெரிவித்தார்.

தலைமைத் தேர்தல் ஆணையர் ஞானேஷ் குமார் தொடர்பாக ஆலோசனை நடத்துவதற்குப் பதிலாக, காவிரி நீர் பிரச்சினை மற்றும் டெல்டா விவசாயிகளின் பிரச்சினைகள் குறித்து கூட்டணி கட்சிகள் கவனம் செலுத்த வேண்டும் என அவர் கூறினார்.

மேலும், தேர்தல் ஆணையம் மற்றும் வாக்காளர் பட்டியல் சிறப்பு தீவிர திருத்தம் தொடர்பான கூட்டத்தில் தமிழக வெற்றிக் கழகம் பங்கேற்றிருக்கக் கூடாது என்பது தனது கருத்து என்றும் தமிழிசை தெரிவித்தார்.

மற்றும் வாக்காளர் பட்டியல் தொடர்பாக அரசியல் கட்சிகளிடையே மாறுபட்ட கருத்துகள் நிலவி வரும் நிலையில், இந்த விவகாரத்தில் தனது விமர்சனத்தை அவர் முன்வைத்தார்.

தொடர்ந்து முதலமைச்சர் விஜயின் தேர்தல் பிரசாரம் குறித்தும் பேசிய தமிழிசை, திரைப்படத் துறையில் இருந்த அனுபவம் காரணமாக மக்களை ஈர்க்கும் வகையிலான பிரசார உத்திகள் அவருக்கு தெரியும் எனக் குறிப்பிட்டார். அதே நேரத்தில், தலைவர்கள் மக்களை நேரடியாக சந்திப்பது பொதுமக்களுக்கு பயனுள்ளதாக இருக்கும் என்றும் அவர் தெரிவித்தார்.

தாராபுரம் இடைத்தேர்தல் அக்டோபர் 6-ம் தேதி நடைபெற உள்ள நிலையில், இறுதிக்கட்ட பிரசாரம் தீவிரமடைந்துள்ளது.

திமுக, தவெக உள்ளிட்ட கட்சிகளின் முக்கிய தலைவர்கள் தொகுதியில் பிரசாரம் மேற்கொண்டு வரும் நிலையில், பரஸ்பர விமர்சனங்களும் அதிகரித்துள்ளன.

Hindusthan Samachar / LOGESHWARI V