புதுடெல்லி, 04 அக்டோபர் (ஹி.ச.)

புதுடெல்லியில் உள்ள 135 ஆண்டுகள் பழமையான மத்திய செயலக நூலகத்தை இடமாற்றம் செய்வது தொடர்பான விவகாரம் உச்சநீதிமன்றத்தின் கவனத்திற்கு சென்றுள்ளது.

8.5 லட்சத்துக்கும் அதிகமான புத்தகங்கள், அரிய நூல்கள், அரசு ஆவணங்கள் மற்றும் அரசிதழ்கள் உள்ளிட்ட முக்கியமான ஆவணங்களை பாதுகாத்து வரும் இந்த நூலகத்தின் எதிர்காலம் குறித்து கேள்விகள் எழுந்துள்ளன.

இந்த விவகாரத்தை உச்சநீதிமன்றம் தாமாக முன்வந்து வழக்காகப் பதிவு செய்துள்ளது.

மத்திய செயலக நூலகம் 1891-ஆம் ஆண்டு கொல்கத்தாவில் ‘இம்பீரியல் செயலக நூலகம்’ என்ற பெயரில் தொடங்கப்பட்டது.

1911-ஆம் ஆண்டு பிரிட்டிஷ் இந்தியாவின் தலைநகர் கொல்கத்தாவிலிருந்து டெல்லிக்கு மாற்றப்பட்டபோது, நூலகமும் டெல்லிக்கு மாற்றப்பட்டது.

பின்னர் நார்த் பிளாக் உள்ளிட்ட பல்வேறு இடங்களில் செயல்பட்ட இந்த நூலகம், 1969-ஆம் ஆண்டு சாஸ்திரி பவனில் உள்ள ‘ஜி’ பிரிவுக்கு மாற்றப்பட்டது.

தற்போது நான்கு தளங்களில் சுமார் 5,500 சதுர மீட்டர் பரப்பளவில் நூலகம் செயல்பட்டு வருகிறது.

மத்திய விஸ்டா மறுசீரமைப்புத் திட்டத்தின் ஒரு பகுதியாக சாஸ்திரி பவனை இடித்து மறுகட்டமைக்கும் நடவடிக்கைகள் மேற்கொள்ளப்பட உள்ளன.

இதனால் அங்கு செயல்பட்டு வரும் நூலகத்தையும் வேறு இடத்திற்கு மாற்ற வேண்டிய நிலை ஏற்பட்டுள்ளது.

இந்த நிலையில், 2026 ஜனவரியில் கார்த்தவ்ய பவன்-2 கட்டிடத்தில் இரண்டு அறைகள், சுமார் 300 சதுர மீட்டர் பரப்பளவில் நூலகத்துக்காக ஒதுக்கப்பட்டதாக தகவல் வெளியானது.

ஆனால் 8.5 லட்சத்துக்கும் அதிகமான புத்தகங்கள் மற்றும் நூலகத்தின் பிற வசதிகளை அந்த அளவிலான இடத்தில் முழுமையாக அமைக்க முடியாது என கலாசார அமைச்சகம் தெரிவித்தது.

இதனால், நூலகத்தை முழுமையாக அந்த இடத்திற்கு மாற்றுவது சாத்தியமில்லை என்ற நிலைப்பாடு முன்வைக்கப்பட்டது.

சாஸ்திரி பவனில் தற்போது நூலகம் பயன்படுத்தும் பரப்பளவுக்கு இணையான இடம் புதிய மத்திய செயலகத்தில் ஒதுக்கப்பட வேண்டும் என கலாசார அமைச்சகம் முன்பே கோரிக்கை வைத்திருந்தது.

சுமார் 5,466 சதுர மீட்டர் பரப்பளவு தேவைப்படுவதாகவும் தெரிவிக்கப்பட்டிருந்தது. நூலகம் மத்திய அரசின் பல்வேறு அமைச்சகங்கள் மற்றும் துறைகளின் அதிகாரிகள் மட்டுமின்றி மாணவர்கள் உள்ளிட்ட பலருக்கும் பயன்பட்டு வருவதாகவும் கூறப்பட்டது.

இதற்கிடையில், நூலகத்திற்கு புதிய மத்திய விஸ்டா திட்டத்தில் இடமே ஒதுக்கப்படவில்லை என்ற தகவலை மத்திய வீட்டு வசதி மற்றும் நகர்ப்புற விவகார அமைச்சகம் மறுத்துள்ளது.

கார்த்தவ்ய பாதை மறுசீரமைப்புத் திட்டத்தில் மத்திய செயலக நூலகத்துக்கான இடம் ஒதுக்கப்பட்டுள்ளதாகவும், புதிய நூலகத்துக்கான கட்டுமானப் பணிகள் தொடர்பான நடவடிக்கைகள் நடைபெற்று வருவதாகவும் அமைச்சகம் தெரிவித்துள்ளது.

இந்த மாறுபட்ட தகவல்களுக்கு இடையே, 135 ஆண்டுகள் பழமையான நூலகத்தின் இடமாற்றம், அதன் 8.5 லட்சத்துக்கும் அதிகமான புத்தகங்கள் மற்றும் அரிய ஆவணங்களின் பாதுகாப்பு ஆகியவை தொடர்பாக உச்சநீதிமன்றம் தாமாக முன்வந்து வழக்கை பதிவு செய்துள்ளது.

இந்த வழக்கு, நீதிபதிகள் சஞ்சய் குமார் மற்றும் சஞ்சீவ் சச்தேவா ஆகியோர் அடங்கிய அமர்வு முன்பு அக்டோபர் 5-ஆம் தேதி விசாரணைக்கு வருகிறது.

நூலகத்திற்கு போதுமான இடம் உள்ளதா, அதன் முழுத் தொகுப்பையும் பாதுகாப்பாக மாற்றுவதற்கான ஏற்பாடுகள் என்ன என்பன உள்ளிட்ட விவகாரங்கள் விசாரணையில் கவனத்திற்கு வரலாம்.

Hindusthan Samachar / LOGESHWARI V