சென்னை, 04 அக்டோபர் (ஹி.ச.)

இந்திய திரையுலகின் பழம்பெரும் இயக்குநரும், முன்னணி திரைப்படக் கலைஞருமான சிங்கீதம் சீனிவாச ராவ் உடல்நலக்குறைவு காரணமாக சென்னையில் நேற்று இரவு காலமானார்.

அவருக்கு 95 வயது.

1931ஆம் ஆண்டு ஆந்திரப் பிரதேசத்தின் உதயகிரியில் பிறந்த சிங்கீதம் சீனிவாச ராவ், சென்னை பல்கலைக்கழகத்தில் இயற்பியல் பட்டம் பெற்றவர்.

இயக்குநர் கே.வி.ரெட்டியிடம் உதவி இயக்குநராக தனது திரைப்பயணத்தைத் தொடங்கிய அவர், பின்னர் தமிழ், தெலுங்கு, கன்னடம், இந்தி உள்ளிட்ட பல்வேறு மொழிகளில் திரைப்படங்களை இயக்கி தனக்கென தனி முத்திரையைப் பதித்தார்.

தமிழில் ‘திக்கற்ற பார்வதி’, ‘ராஜபார்வை’, ‘அபூர்வ சகோதரர்கள்’, ‘மைக்கேல் மதன காமராஜன்’, ‘புஷ்பக விமானம்’, ‘மகளிர் மட்டும்’ உள்ளிட்ட குறிப்பிடத்தக்க திரைப்படங்களை அவர் இயக்கியுள்ளார்.

குறிப்பாக, கமல்ஹாசனுடன் இணைந்து பல புதுமையான திரைப்படங்களை உருவாக்கியதன் மூலம் ரசிகர்கள் மத்தியில் பெரும் வரவேற்பைப் பெற்றார்.

‘திக்கற்ற பார்வதி’ மற்றும் ‘புஷ்பக விமானம்’ ஆகிய திரைப்படங்களுக்காக தேசிய திரைப்பட விருதுகளையும் சிங்கீதம் சீனிவாச ராவ் பெற்றுள்ளார்.

அறிவியல் புனைகதை, நகைச்சுவை, கற்பனை, சமூக நாடகம் உள்ளிட்ட பல்வேறு களங்களில் புதுமையான முயற்சிகளை மேற்கொண்டவர் என்ற பெருமையும் அவருக்கு உண்டு.

90 வயதைக் கடந்த பின்னரும் திரைப்படத் துறையில் தொடர்ந்து இயங்கி வந்த அவர், தனது இறுதிப் படமாக ‘சிங்கீதம்’ என்ற திரைப்படத்தை இயக்கியிருந்தார்.

94 வயதில் அந்தப் படத்தை இயக்கியதன் மூலம் திரைப்படத் துறையில் தனது அர்ப்பணிப்பை இறுதிவரை வெளிப்படுத்தினார்.

சிங்கீதம் சீனிவாச ராவின் மறைவுக்கு திரையுலகினர், ரசிகர்கள் உள்ளிட்ட பலரும் இரங்கல் தெரிவித்து வருகின்றனர்.

Hindusthan Samachar / VINOTH KUMAR P