சென்னை, 06 அக்டோபர் (ஹி.ச.)

பணி நிரந்தரம், பணி பாதுகாப்பு, சம வேலைக்கு சம ஊதியம் உள்ளிட்ட கோரிக்கைகளை வலியுறுத்தி சென்னையில் போராட்டத்தில் ஈடுபட்ட செவிலியர்கள் மீது காவல்துறை நடவடிக்கை எடுத்ததாக கூறப்படும் சம்பவத்திற்கு, தமிழக சட்டப்பேரவை எதிர்க்கட்சித் தலைவர் உதயநிதி ஸ்டாலின் கண்டனம் தெரிவித்துள்ளார்.

சென்னை எழும்பூர் ராஜரத்தினம் மைதானம் அருகே தமிழ்நாடு இடைநிலை சுகாதாரப் பணியாளர்கள் சங்கம் சார்பில் ஆயிரக்கணக்கான செவிலியர்கள் உண்ணாவிரதப் போராட்டத்தில் ஈடுபட்டனர்.

பணி நிரந்தரம், சம வேலைக்கு சம ஊதியம் உள்ளிட்ட பல்வேறு கோரிக்கைகளை அரசு நிறைவேற்ற வேண்டும் என அவர்கள் வலியுறுத்தினர்.

போராட்டத்தின்போது போலீசாருக்கும், செவிலியர்களுக்கும் இடையே தள்ளுமுள்ளு ஏற்பட்டதுடன், சிலர் கைது செய்யப்பட்டதாக செய்திகள் வெளியாகின.

இந்த நிலையில், உதயநிதி ஸ்டாலின் தனது எக்ஸ் தளப் பதிவில், செவிலியர்கள் மீது காவல்துறையை ஏவி தாக்குதல் நடத்தப்பட்டதாக குற்றம்சாட்டியுள்ளார்.

மேலும், போராட்டக் களத்தில் செவிலியர்களுக்கு இடையூறு ஏற்படுத்தப்பட்டதாகவும், மின்சாரம் துண்டிக்கப்பட்டதாகவும், அவர்களை மிரட்டியதாகவும் அவர் தனது பதிவில் குறிப்பிட்டுள்ளார்.

மேலும், போராட்டத்தில் ஈடுபட்ட செவிலியர்களுடன் அவர்களின் குழந்தைகளும் இருந்த நிலையில், குழந்தைகள் மீதும் தாக்குதல் நடத்தப்பட்டதாக உதயநிதி ஸ்டாலின் குற்றம்சாட்டியுள்ளார்.

இதுபோன்ற நடவடிக்கை ஏற்றுக்கொள்ள முடியாதது என்றும் அவர் தெரிவித்துள்ளார்.

தொடர்ந்து, எதிர்க்கட்சியாக இருந்தபோது செவிலியர்களை பணி நிரந்தரம் செய்வதாக வாக்குறுதி அளித்ததாக கூறப்படும் ஆட்சியாளர்கள், தற்போது அவர்களின் போராட்டத்தை கையாள காவல்துறையை பயன்படுத்துவதாகவும் உதயநிதி ஸ்டாலின் விமர்சித்துள்ளார்.

செவிலியர்கள் மீதான நடவடிக்கையை உடனடியாக நிறுத்தி, அவர்களை பேச்சுவார்த்தைக்கு அழைத்து, அவர்களின் கோரிக்கைகள் தொடர்பாக உரிய தீர்வு காண அரசு நடவடிக்கை எடுக்க வேண்டும் என்றும் அவர் வலியுறுத்தியுள்ளார்.

இதனிடையே, அரசு தரப்பில் பேச்சுவார்த்தை நடத்தப்பட்டதைத் தொடர்ந்து சென்னையில் நடைபெற்ற செவிலியர்களின் போராட்டம் தற்காலிகமாக வாபஸ் பெறப்பட்டுள்ளது.

கோரிக்கைகள் நிறைவேற்றப்படாவிட்டால் நவம்பர் 3-ஆம் தேதிக்குப் பிறகு மீண்டும் போராட்டம் நடத்தப்படும் என செவிலியர் சங்க நிர்வாகிகள் தெரிவித்துள்ளனர்.

Hindusthan Samachar / LOGESHWARI V