கலபுரகி, 07 அக்டோபர் (ஹி.ச.)

கர்நாடக மாநிலம்,

கலபுரகி விமான நிலையத்தை ஒட்டிய பகுதியில் உள்ள தனியார் விமானப் பயிற்சி நிறுவனத்துக்குச் சொந்தமான இரண்டு இருக்கைகள் கொண்ட சிறிய விமானம், செவ்வாய்க்கிழமை மாலை வழக்கமான பயிற்சி விமானத்தில் ஈடுபட்டிருந்ததாகக் கூறப்படுகிறது.

விமானம் பறந்து கொண்டிருந்தபோது திடீரென தொழில்நுட்பக் கோளாறு ஏற்பட்டதாக தகவல் வெளியாகியுள்ளது.

இதையடுத்து விமானத்தில் இருந்தவர்கள் நிலைமையை உடனடியாகக் கட்டுக்குள் கொண்டு வந்து, மக்கள் வசிக்கும் பகுதிகளைத் தவிர்த்து, பாதுகாப்பான இடத்தில் விமானத்தைத் தரையிறக்க முயன்றனர்.

இறுதியில் கலபுரகி விமான நிலையம் அருகே உள்ள பாலா (Pala) கிராமப் பகுதியில், பயிரிடப்பட்டிருந்த விவசாய நிலத்தில் விமானம் பாதுகாப்பாக தரையிறக்கப்பட்டது.

இந்த சம்பவம் மாலை சுமார் 5.40 மணியளவில் நடைபெற்றதாக தகவல்கள் தெரிவிக்கின்றன.

விமானம் விவசாய நிலத்தில் தரையிறங்கியதைக் கண்ட அப்பகுதி மக்கள் ஆச்சரியமடைந்து சம்பவ இடத்தை நோக்கி திரண்டனர். இதனால் அப்பகுதியில் சிறிது நேரம் பரபரப்பான சூழல் நிலவியது.

தகவல் அறிந்ததும் கலபுரகி மாநகர காவல்துறையினர் மற்றும் விமான நிலைய அதிகாரிகள் சம்பவ இடத்துக்கு விரைந்து சென்றனர்.

விமானத்தில் இருந்த பயிற்றுநர் மற்றும் பயிற்சி விமானி இருவரும் பாதுகாப்பாக இருப்பது உறுதி செய்யப்பட்டது. இந்தச் சம்பவத்தில் உயிரிழப்பு அல்லது காயம் ஏற்பட்டதாக எந்தத் தகவலும் வெளியாகவில்லை.

விமானத்தில் ஏற்பட்ட தொழில்நுட்பக் கோளாறுக்கான காரணம் குறித்து விமான நிலைய அதிகாரிகள் விசாரணை மேற்கொண்டு வருகின்றனர்.

விமானத்தின் தொழில்நுட்ப நிலை, கோளாறு ஏற்பட்டதற்கான காரணம் உள்ளிட்ட விவரங்கள் ஆய்வுக்குப் பிறகே முழுமையாக தெரியவரும் என அதிகாரிகள் தெரிவித்துள்ளனர்.

Hindusthan Samachar / LOGESHWARI V