புதுக்கோட்டை, 07 அக்டோபர் (ஹி.ச.)

பிரதமர் நரேந்திர மோடியின் 25 ஆண்டுகால அரசியல் மற்றும் கட்சிப் பணியைப் போற்றும் வகையில், புதுக்கோட்டையில் பாரதிய ஜனதா கட்சி சார்பில் ஜோதி பேரணி நடைபெற்றது.

புதுக்கோட்டை திலகர் மைதானத்தில் நடைபெற்ற இந்த நிகழ்ச்சிக்கு, பாஜக மாவட்டத் தலைவர் ராமச்சந்திரன் தலைமை வகித்தார். மாநிலச் செயலாளர் சதீஷ்குமார் சிறப்பு விருந்தினராகக் கலந்து கொண்டார்.

மேலும், பாஜக மருத்துவ அணியின் பொறுப்பாளர் பிரேம்குமார் உள்ளிட்ட கட்சி நிர்வாகிகள் முன்னிலை வகித்தனர். நிகழ்ச்சியின் ஒரு பகுதியாக, பிரதமர் நரேந்திர மோடி காணொலி காட்சி வாயிலாக உரையாற்றினார்.

கட்சிப் பணியில் பிரதமர் மோடி கடந்த 25 ஆண்டுகளாக ஆற்றிய பங்களிப்புகள் மற்றும் அவரது அரசியல் பயணம் குறித்து இந்த நிகழ்ச்சியில் கட்சி நிர்வாகிகள் மற்றும் தொண்டர்களுக்கு எடுத்துரைக்கப்பட்டது.

இதனைத் தொடர்ந்து, பிரதமர் நரேந்திர மோடியின் 25 ஆண்டுகால அரசியல் சேவையைப் பாராட்டும் விதமாக புதுக்கோட்டை பாஜக சார்பில் ஜோதி பேரணி நடைபெற்றது. திலகர் மைதானத்தில் இருந்து தொடங்கிய பேரணி, பிருந்தாவனம் பகுதி வரை நடைபெற்றது.

பேரணியில் பாஜக கட்சி நிர்வாகிகள், தொண்டர்கள், மகளிர் அணியினர் உள்ளிட்ட ஏராளமானோர் கலந்து கொண்டனர். அவர்கள் கைகளில் ஜோதியை ஏந்தியபடி நடைபயணமாகச் சென்றனர்.

வழிநெடுகிலும் பிரதமர் நரேந்திர மோடியின் அரசியல் பயணம் மற்றும் நாட்டுக்காக அவர் மேற்கொண்டதாக கட்சி தரப்பில் குறிப்பிடப்படும் பல்வேறு பணிகள் குறித்து எடுத்துரைக்கப்பட்டது.

மேலும், கட்சியின் வளர்ச்சிக்காக பிரதமர் மோடி நீண்ட காலமாக மேற்கொண்ட பணிகளை நினைவுகூரும் வகையில் இந்தப் பேரணி ஏற்பாடு செய்யப்பட்டதாக பாஜக நிர்வாகிகள் தெரிவித்தனர்.

புதுக்கோட்டை நகரில் நடைபெற்ற இந்த ஜோதி பேரணியில் கட்சி நிர்வாகிகள் மற்றும் தொண்டர்கள் உற்சாகத்துடன் பங்கேற்றனர்.

நிகழ்ச்சியையொட்டி, பேரணி நடைபெற்ற பகுதிகளில் போலீசார் பாதுகாப்புப் பணியில் ஈடுபட்டனர்.

Hindusthan Samachar / LOGESHWARI V