புதுடெல்லி, 08 அக்டோபர் (ஹி.ச.)

57-வது ஜிஎஸ்டி கவுன்சில் கூட்டம் மத்திய நிதியமைச்சர் நிர்மலா சீதாராமன் தலைமையில் இன்று புதுடெல்லியில் நடைபெறுகிறது.

ஜிஎஸ்டி நடைமுறைகளை எளிமைப்படுத்துவது, வரி நிர்வாகத்தில் சீர்திருத்தங்களை மேற்கொள்வது உள்ளிட்ட பல்வேறு முக்கிய அம்சங்கள் குறித்து இந்தக் கூட்டத்தில் ஆலோசிக்கப்பட உள்ளன.

இந்தக் கூட்டத்தில் வரி விகிதங்களில் பெரிய அளவிலான மாற்றங்களை மேற்கொள்வதைவிட, ஜிஎஸ்டி நடைமுறைகளை எளிதாக்குவதற்கான சீர்திருத்தங்களுக்கு முக்கியத்துவம் அளிக்கப்படும் என எதிர்பார்க்கப்படுகிறது.

குறிப்பாக, ஜிஎஸ்டி பதிவு, ரிட்டர்ன் தாக்கல், உள்ளீட்டு வரிச்சலுகை, வரி திருப்பிச் செலுத்துதல் மற்றும் வரி தொடர்பான சர்ச்சைகளுக்கு தீர்வு காண்பது உள்ளிட்ட அம்சங்கள் குறித்து விவாதிக்கப்பட உள்ளன.

நிறுவனங்கள் தங்களது ஊழியர்களுக்காக செலுத்தும் குழு மருத்துவம் மற்றும் ஆயுள் காப்பீட்டு பிரீமியத்துக்கு செலுத்தப்படும் ஜிஎஸ்டிக்கு உள்ளீட்டு வரிச்சலுகை வழங்குவது தொடர்பான முன்மொழிவும் கவனத்தில் உள்ளது.

தற்போது நிறுவனங்களுக்கு செலவாகக் கருதப்படும் இந்த வரியை உள்ளீட்டு வரிச்சலுகையாகப் பயன்படுத்த அனுமதிப்பது குறித்து ஆலோசிக்கப்படுகிறது.

மேலும், ஜிஎஸ்டி பதிவு மற்றும் ஆண்டு ரிட்டர்ன் தாக்கல் நடைமுறைகளை எளிமைப்படுத்துவது குறித்தும் கவனம் செலுத்தப்பட உள்ளது. வரி செலுத்துவோரின் இணக்கச் சுமையைக் குறைத்து, தேவையற்ற நிர்வாகப் பணிகளைத் தவிர்ப்பதே இதன் நோக்கமாகக் கூறப்படுகிறது.

வரி திருப்பிச் செலுத்தும் நடைமுறையை விரைவுபடுத்துவது, உள்ளீட்டு வரிச்சலுகை தொடர்பான சிக்கல்களைத் தீர்ப்பது மற்றும் வரி தொடர்பான தேவையற்ற வழக்குகளைக் குறைப்பது குறித்தும் ஆலோசனை நடைபெற உள்ளது.

மேலும், ஜிஎஸ்டி அதிகாரிகளின் கைது அதிகாரம் மற்றும் குற்றவியல் நடவடிக்கைக்கான வரம்பு தொடர்பான சீர்திருத்தங்களும் கூட்டத்தின் முக்கிய விவாதப் பொருட்களில் இடம்பெற்றுள்ளன.

இதன் மூலம் தொழில் நிறுவனங்கள் மற்றும் வரி செலுத்துவோருக்கான நடைமுறைகளை எளிதாக்கி, ஜிஎஸ்டி நிர்வாகத்தை மேலும் வெளிப்படையாகவும் திறமையாகவும் மாற்றுவதற்கான நடவடிக்கைகள் குறித்து கவுன்சில் ஆலோசிக்க உள்ளது.

இருப்பினும், மேற்கண்ட அம்சங்கள் தொடர்பான இறுதி முடிவுகள் கூட்டத்தின் முடிவில் அதிகாரப்பூர்வமாக அறிவிக்கப்படும்.

Hindusthan Samachar / LOGESHWARI V