சூரஜ்பூர், 09 அக்டோபர் (ஹி.ச.)

சத்தீஸ்கர் மாநிலம் சூரஜ்பூர் நகரில் கடந்த 2024 அக்டோபர் 13-ஆம் தேதி இரவு இந்தச் சம்பவம் நடைபெற்றது.

காவல்துறை தலைமை காவலர் ஒருவர் பணியில் இருந்தபோது, அவரைத் தாக்கியதாகக் கூறப்படும் குல்தீப் சாகு, காவல்துறையினரிடம் இருந்து தப்பிச் சென்றுள்ளார்.

பின்னர், அந்தத் தலைமை காவலரின் வீட்டுக்குள் புகுந்த அவர், தனது கூட்டாளிகளுடன் சேர்ந்து காவலரின் 35 வயது மனைவி மற்றும் 11 வயது மகள் மீது தாக்குதல் நடத்தியதாகக் காவல்துறை தெரிவித்தது.

பெண் பாலியல் வன்கொடுமைக்கு ஆளாக்கப்பட்டதுடன், தாயும் மகளும் கூர்மையான ஆயுதங்களால் தாக்கப்பட்டு கொலை செய்யப்பட்டதாக வழக்கு விசாரணையில் தெரிவிக்கப்பட்டது.

அவர்களது உடல்கள் வீட்டிலிருந்து சில கிலோமீட்டர் தொலைவில் உள்ள பிதா கிராமப் பகுதியில் வீசப்பட்டதாகவும் தகவல்கள் தெரிவிக்கின்றன.

இந்த வழக்கை இன்று விசாரித்த சூரஜ்பூர் மாவட்ட விரைவு நீதிமன்ற நீதிபதி ஆனந்த் பிரகாஷ் வாரியல், நான்கு பேரையும் குற்றவாளிகளாக அறிவித்தார்.

முக்கிய குற்றவாளியான குல்தீப் சாகு (32), சந்திரகாந்த் சௌத்ரி (28), பூல் சிங் என்ற ரிங்கு (28) ஆகிய மூவருக்கும் மரண தண்டனை விதிக்கப்பட்டது.

ஆர்யன் விஸ்வகர்மா என்ற கோல்டிக்கு (20) ஆயுள் தண்டனை வழங்கப்பட்டது. இந்த வழக்கில் பெண்ணின் உடலில் 33 காயங்களும், சிறுமியின் உடலில் 28 காயங்களும் இருந்ததாக அரசுத் தரப்பு வழக்கறிஞர் தெரிவித்தார்.

இந்த வழக்கில் வழங்கப்பட்டுள்ள மரண தண்டனைகள் நடைமுறைக்கு வருவதற்கு சத்தீஸ்கர் உயர் நீதிமன்றத்தின் உறுதிப்படுத்தல் அவசியம். குற்றவாளிகள் தீர்ப்பையும் தண்டனையையும் எதிர்த்து மேல்முறையீடு செய்யவும் சட்டப்படி வாய்ப்புள்ளது.

இந்தச் சம்பவம் அப்பகுதியில் பெரும் அதிர்ச்சியை ஏற்படுத்திய நிலையில், நீதிமன்றத்தின் தீர்ப்பு தற்போது கவனம் பெற்றுள்ளது.

Hindusthan Samachar / LOGESHWARI V