திருநெல்வேலி, 09 அக்டோபர் (ஹி.ச.)

திருநெல்வேலி பகுதியைச் சேர்ந்த 15 வயது பள்ளி மாணவி ஒருவர், சில நாட்களுக்கு முன்பு நள்ளிரவு நேரத்தில் தனது ஆண் நண்பருடன் பேசிக்கொண்டிருந்ததாகக் கூறப்படுகிறது.

அப்போது, இருசக்கர வாகனத்தில் அங்கு வந்த மூன்று பேர், மாணவியை மிரட்டி அவரிடம் இருந்த தங்க நகைகளைப் பறித்துள்ளனர்.

இதையடுத்து, மாணவி அணிந்திருந்த 4 கிராம் தங்கச் சங்கிலி மற்றும் 2 கிராம் எடையுள்ள தங்கக் கம்மல் ஆகியவற்றை அவர்கள் எடுத்துச் சென்றதாகத் தெரிகிறது.

மேலும், மாணவியுடன் இருந்த ஆண் நண்பரின் செல்போனையும் பறித்துக்கொண்டு மூவரும் அங்கிருந்து தப்பிச் சென்றுள்ளனர்.

இந்தச் சம்பவம் தொடர்பாக ஆரம்பத்தில் யாரும் புகார் அளிக்க முன்வராத நிலையில், போலீசாருக்கு ரகசியத் தகவல் கிடைத்ததாகக் கூறப்படுகிறது.

இதையடுத்து, மாநகர காவல் ஆணையர் தேஷ்முக் சேகர் சஞ்சய் உத்தரவின்பேரில், நெல்லை டவுன் போலீசார் சம்பவம் குறித்து விசாரணையைத் தொடங்கினர்.

பாதிக்கப்பட்ட மாணவியிடம் இருந்து புகார் பெற்ற போலீசார், நகைகளைப் பறித்துச் சென்ற நபர்கள் யார் என்பது குறித்து விசாரணை நடத்தினர்.

விசாரணையின் அடிப்படையில், இந்தச் சம்பவத்தில் மானூர் அருகே உள்ள தென்பத்து கிராமத்தைச் சேர்ந்த சுரேஷ் (26) மற்றும் இரண்டு சிறுவர்கள் ஈடுபட்டிருந்ததாகத் தெரியவந்தது.

இதனைத் தொடர்ந்து போலீசார் நடவடிக்கை மேற்கொண்டு, சுரேஷ் மற்றும் 17 வயது சிறுவனை கைது செய்தனர்.

இந்தச் சம்பவத்தில் தொடர்புடையதாகக் கூறப்படும் மற்றொரு சிறுவன், வேறொரு வழக்கில் சிக்கி ஏற்கெனவே கூர்நோக்கு இல்லத்தில் இருப்பது விசாரணையில் தெரியவந்துள்ளது.

நள்ளிரவு நேரத்தில் பள்ளி மாணவியை மிரட்டி நகைகள் பறிக்கப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.

இந்த வழக்கில் தொடர்புடையவர்களைக் கண்டறிந்து நடவடிக்கை எடுக்கும் வகையில் போலீசார் விசாரணை மேற்கொண்டுள்ளனர்.

Hindusthan Samachar / LOGESHWARI V