புதுடெல்லி, 01 நவம்பர் (ஹி.ச.)

இந்திய விமானப்படையின் எதிர்கால செயல்பாடுகள் மற்றும் பாதுகாப்புத் திட்டங்கள் குறித்து தலைநகர் டெல்லியில் பேசிய விமானப்படை தலைமைத் தளபதி ஏர் சீஃப் மார்ஷல் அசுதோஷ் தீட்சித், 'VAYU' என்ற நான்கு முக்கிய அம்சங்களை உள்ளடக்கிய செயல்திட்டத்தை விளக்கியுள்ளார்.

இதில் போர் தயார் நிலை, தற்சார்பு தொழில்நுட்பம், புத்தாக்கம் மற்றும் முப்படைகளின் ஒருங்கிணைப்பு ஆகியவற்றுக்கு முக்கியத்துவம் அளிக்கப்பட்டுள்ளது.

விமானப்படையின் ஒவ்வொரு படைப்பிரிவும், ரேடார் கண்காணிப்பு அமைப்பும், வான் பாதுகாப்புப் பிரிவும் எந்த நேரத்திலும் எதிரிகளின் நடவடிக்கைகளை எதிர்கொள்ளத் தயாராக இருக்க வேண்டும் என்று அவர் தெரிவித்துள்ளார்.

மேலும், விமானப்படையின் போர் வலிமையை அங்கீகரிக்கப்பட்ட அளவிற்கு மீண்டும் உயர்த்துவது தனது முதன்மையான இலக்குகளில் ஒன்றாக இருக்கும் என்றும் குறிப்பிட்டுள்ளார்.

இந்தியாவின் தற்சார்பு பாதுகாப்புத் தொழில்நுட்ப வளர்ச்சிக்கு அதிக முக்கியத்துவம் அளிக்கப்படும் என்று தெரிவிக்கப்பட்டுள்ளது.

குறிப்பாக, தேஜஸ் எம்.கே.1ஏ, தேஜஸ் எம்.கே.2 மற்றும் மேம்பட்ட நடுத்தர ரக போர் விமானத் திட்டமான ஏஎம்சிஏ (AMCA) ஆகியவற்றின் வளர்ச்சிக்கு முன்னுரிமை வழங்கப்படும்.

மேலும், இந்தியாவில் தயாரிக்கப்படும் ரேடார் உணரிகள், கண்காணிப்புக் கருவிகள் மற்றும் ஆயுதங்களை அதிக அளவில் பயன்படுத்துவதற்கான நடவடிக்கைகள் மேற்கொள்ளப்படும்.

வெளிநாட்டுத் தொழில்நுட்பங்களைச் சார்ந்திருப்பதைக் குறைத்து, உள்நாட்டு உற்பத்தித் திறனை வலுப்படுத்துவதே இதன் நோக்கமாகும்.

செயற்கை நுண்ணறிவு (AI) அடிப்படையிலான கட்டளை மற்றும் கட்டுப்பாட்டு அமைப்புகள், ஆளில்லா ட்ரோன்களை எதிர்கொள்ளும் பல அடுக்கு பாதுகாப்பு முறைகள், விரைவான பராமரிப்பு வசதிகள் மற்றும் படைகளின் பாதுகாப்பை மேம்படுத்தும் தொழில்நுட்பங்கள் உருவாக்கப்படும் என்று அவர் தெரிவித்துள்ளார்.

மேலும், விண்வெளிக்கு அருகிலுள்ள பகுதிகளை விமானப்படையின் எதிர்காலச் செயல்பாடுகளுக்குப் பயன்படுத்துவதற்கான வாய்ப்புகளும் ஆராயப்படும்.

இந்திய ராணுவம், கடற்படை மற்றும் தேசிய பாதுகாப்பு அமைப்புகளுடன் இணைந்து செயல்படுவதற்கு முக்கியத்துவம் அளிக்கப்படும்.

கூட்டு நடவடிக்கை, தற்சார்பு மற்றும் புத்தாக்கம் ஆகியவற்றை உள்ளடக்கிய 'JAI' என்ற தொலைநோக்குப் பார்வையின் அடிப்படையில் முப்படைகளும் ஒருங்கிணைந்து செயல்படும்.

போர் ஏற்படுவதைத் தடுப்பதற்கு நம்பகமான வான்வழி ராணுவ வலிமை அவசியம் என்றும், போர் ஏற்பட்டால் வெற்றிபெறும் திறனை இந்திய விமானப்படை தொடர்ந்து மேம்படுத்தும் என்றும் தலைமைத் தளபதி அசுதோஷ் தீட்சித் தெரிவித்துள்ளார்.

Hindusthan Samachar / LOGESHWARI V