தமிழ்நாடு, 12 நவம்பர் (ஹி.ச.)

மிளகாய் சாகுபடி மூலம் விவசாயிகள் நல்ல வருமானம் பெறுவதற்கு முறையான திட்டமிடலும், சரியான பயிர் மேலாண்மையும் அவசியமாகும். குறிப்பாக, சாகுபடிச் செலவைக் கட்டுப்படுத்தி, தரமான விளைச்சலைப் பெறுவதுடன் சந்தை நிலவரத்திற்கு ஏற்ப விற்பனை செய்வதன் மூலம் லாபத்தை அதிகரிக்க முடியும்.

இந்த மிளகாய் சாகுபடியைத் தொடங்குவதற்கு முன்பு, அந்தந்த பகுதியின் மண் வகை மற்றும் காலநிலைக்கு ஏற்ற ரகங்களைத் தேர்வு செய்ய வேண்டும். தரமான சான்றளிக்கப்பட்ட விதைகளைப் பயன்படுத்துவது ஆரோக்கியமான நாற்றுகள் வளரவும், நல்ல மகசூல் கிடைக்கவும் உதவும்.

பயிருக்கு தேவையான அளவு தண்ணீர் வழங்குவது மிகவும் முக்கியம். சொட்டு நீர்ப்பாசன முறையைப் பயன்படுத்துவதன் மூலம் தண்ணீரைச் சிக்கனமாகப் பயன்படுத்துவதுடன், உரங்களையும் பயிர்களுக்குத் தேவையான அளவில் வழங்க முடியும். மேலும், நிலத்தில் மல்ச்சிங் செய்வதால் களைகளின் வளர்ச்சியைக் கட்டுப்படுத்தவும் ஈரப்பதத்தைப் பாதுகாக்கவும் உதவுகிறது.

பயிரில் இலைச்சுருட்டு வைரஸ் நோய், த்ரிப்ஸ், அசுவினி மற்றும் சிலந்திப்பேன் போன்ற பூச்சிகளால் பாதிப்பு ஏற்பட வாய்ப்புள்ளது.

இதனால் செடிகளின் வளர்ச்சி பாதிக்கப்பட்டு மகசூல் குறையலாம். எனவே, வாரந்தோறும் பயிர்களைக் கண்காணித்து ஆரம்ப நிலையிலேயே பாதிப்புகளைக் கண்டறிந்து உரிய கட்டுப்பாட்டு நடவடிக்கைகளை மேற்கொள்ள வேண்டும்.

மிளகாயை பச்சையாகவும், நன்கு பழுக்க வைத்து உலர்த்தியும் விற்பனை செய்யலாம்.

எந்த முறையில் அதிக வருமானம் கிடைக்கும் என்பதை உள்ளூர் சந்தை விலை மற்றும் விற்பனை வாய்ப்புகளின் அடிப்படையில் முடிவு செய்ய வேண்டும். அறுவடைக்கு முன்பே வியாபாரிகளுடன் தொடர்பு கொள்வதும் பயனுள்ளதாக இருக்கும்.

மிளகாய் சாகுபடியில் கிடைக்கும் வருமானம் ரகம், பருவநிலை, மகசூல், பராமரிப்பு மற்றும் சந்தை விலை ஆகியவற்றைப் பொறுத்து மாறுபடும்.

எனவே, மண் பரிசோதனை செய்து தேவையான உரங்களை மட்டும் பயன்படுத்தி, தேவையற்ற செலவுகளைக் குறைத்து சாகுபடி செய்வது விவசாயிகளின் நிகர லாபத்தை அதிகரிக்க உதவும்.

Hindusthan Samachar / LOGESHWARI V