சென்னை, 13 நவம்பர் (ஹி.ச.)

தமிழகத்தில் பெண்களுக்கு எதிரான பாலியல் குற்றங்கள் தொடர்பாகவும், தவெக நிர்வாகிகள் மீது எழுந்துள்ள புகார்கள் குறித்தும் முதலமைச்சர் ச. ஜோசப் விஜய்யை பாஜக மாநிலத் தலைவர் நயினார் நாகேந்திரன் கடுமையாக விமர்சித்துள்ளார்.

இதுதொடர்பாக அவர் வெளியிட்டுள்ள எக்ஸ் தளப்பதிவில் அவர்,

பெண்களின் பாதுகாப்பை உறுதி செய்ய முடியாதவர்களுக்கு முதலமைச்சர் பதவி எதற்கு என்றும் அவர் கேள்வி எழுப்பியுள்ளார்.

மேலும் கள்ளக்குறிச்சி தொகுதியைச் சேர்ந்த தவெக சட்டமன்ற உறுப்பினர் ஒருவர், மாவட்ட பெண் ஆட்சியருக்கு ஆட்சேபனைக்குரிய வகையில் குறுஞ்செய்தி அனுப்பியதாக வெளியான தகவலை நயினார் நாகேந்திரன் சுட்டிக்காட்டியுள்ளார்.

இந்த விவகாரம் தொடர்பான சர்ச்சை அடங்குவதற்குள், கோவை மாவட்டம் காரமடையைச் சேர்ந்த தவெக ஒன்றியச் செயலாளர் கருப்பசாமி மீது மற்றொரு புகார் எழுந்துள்ளதாகவும் குறிப்பிட்டுள்ளார்.

அதன்படி, கட்சியின் பெண் நிர்வாகி ஒருவருக்குத் தொடர்ந்து பாலியல் தொல்லை அளித்ததாகவும், அதற்கு அவர் ஒத்துழைக்க மறுத்ததால் சாதியைக் குறிப்பிட்டு அவமதித்ததாகவும் செய்திகள் வெளியாகியுள்ளதாக தெரிவித்துள்ளார்.

இத்தகைய புகார்கள் குறித்து கட்சித் தலைமை உரிய நடவடிக்கை எடுக்க வேண்டும் என்றும் அவர் வலியுறுத்தியுள்ளார்.

மேலும், பெண்களின் பாதுகாப்பு தொடர்பான விவகாரங்களில் தவெக தலைமை போதிய கவனம் செலுத்தவில்லை என்றும், கட்சியினரின் செயல்பாடுகளைக் கண்டிக்காமல் முதலமைச்சர் விஜய் அமைதி காப்பதாகவும் அவர் குற்றம்சாட்டியுள்ளார்.

தவெக அரசு பொறுப்பேற்ற பிறகு பெண்கள் மற்றும் குழந்தைகளுக்கு எதிராக 300-க்கும் மேற்பட்ட பாலியல் குற்றங்கள் நடைபெற்றுள்ளதாகவும், அவற்றில் 30-க்கும் அதிகமான சம்பவங்களில் தவெகவினர் தொடர்புடையவர்கள் என்றும் தனது பதிவில் நயினார் நாகேந்திரன் குறிப்பிட்டுள்ளார்.

இந்தப் புள்ளிவிவரங்கள் தொடர்பாக அவர் ஆதாரங்களைப் பதிவில் விரிவாக வழங்கவில்லை. தொடர்ந்து, பெண்களின் பாதுகாப்புக்கு முக்கியத்துவம் அளிப்பதற்குப் பதிலாக முதலமைச்சர் விளம்பர நடவடிக்கைகளில் கவனம் செலுத்துவதாக விமர்சித்துள்ளார்.

மாற்றத்தை ஏற்படுத்துவதாகக் கூறி ஆட்சிக்கு வந்தவர்கள், பெண்களின் பாதுகாப்பை உறுதி செய்வதில் பொறுப்புடன் செயல்பட வேண்டும் என்றும் தனது எக்ஸ் தளப் பதிவில் நயினார் நாகேந்திரன் வலியுறுத்தியுள்ளார்.

Hindusthan Samachar / LOGESHWARI V