புதுடெல்லி, 14 நவம்பர் (ஹி.ச.)

மக்களவை எதிர்க்கட்சித் தலைவர் ராகுல் காந்தி எழுப்பியுள்ள தொலைபேசி ஒட்டுக்கேட்பு குற்றச்சாட்டுகள் தொடர்பாக, தெலங்கானா காங்கிரஸ் கட்சியின் ஊடகம் மற்றும் விளம்பரப் பிரிவுத் தலைவர் மற்றும் நாடாளுமன்ற உறுப்பினர் கிரண் குமார் சாமலா கருத்துத் தெரிவித்துள்ளார்.

மத்திய அரசு தனது அதிகாரத்தைப் பயன்படுத்தி எதிர்க்கட்சிகளையும் மாநில அரசுகளையும் கட்டுப்படுத்த முயற்சிப்பதாக அவர் குற்றம்சாட்டியுள்ளார்.

இதுதொடர்பாக செய்தியாளர்களிடம் பேசிய கிரண் குமார் சாமலா,

பிரதமர் நரேந்திர மோடி மத்திய அரசின் பல்வேறு நிர்வாக அமைப்புகளைப் பயன்படுத்த விரும்புவதாகக் குற்றம்சாட்டினார்.

மேலும், நாட்டின் கூட்டாட்சிக் கட்டமைப்பை வலுவிழக்கச் செய்து, அனைத்து அதிகாரங்களையும் மத்திய அரசின் கட்டுப்பாட்டுக்குள் கொண்டுவரும் முயற்சிகள் நடைபெறுவதாகவும் அவர் தெரிவித்தார்.

எதிர்க்கட்சித் தலைவர்கள் மற்றும் பிராந்தியக் கட்சிகள் ஆட்சி செய்யும் மாநிலங்களைக் கட்டுப்படுத்துவதற்காகப் பல்வேறு வழிமுறைகள் பயன்படுத்தப்படுவதாகவும், தொலைபேசி ஒட்டுக்கேட்பு விவகாரம் புதிதல்ல என்றும் அவர் கூறினார்.

கடந்த காலத்தில் தெலங்கானாவில் கே. சந்திரசேகர் ராவ் தலைமையிலான பாரத ராஷ்டிர சமிதி ஆட்சியிலும் தொலைபேசி ஒட்டுக்கேட்பு விவகாரம் எழுந்ததாகக் குறிப்பிட்டார்.

மேலும், இந்த விவகாரம் தொடர்பாகத் தெலங்கானா முதலமைச்சர் நேற்று தெளிவான கருத்தைத் தெரிவித்துள்ளதாகவும், விரைவில் உரிய நடவடிக்கை எடுக்கப்படும் என அவர் கூறியுள்ளதாகவும் கிரண் குமார் சாமலா தெரிவித்தார்.

இதற்கிடையில், தெலங்கானாவில் கிக் தொழிலாளர்களின் பாதுகாப்பை உறுதி செய்வதற்காக மாநில அரசு சட்டமன்றத்தில் புதிய சட்டத்தை நிறைவேற்றியுள்ளதாக கிரண் குமார் சாமலா சாடினார்.

உணவு விநியோகம், பொருட்கள் விநியோகம் உள்ளிட்ட தளங்கள் வாயிலாகப் பணியாற்றும் கிக் தொழிலாளர்கள் பல்வேறு பாதுகாப்பற்ற சூழல்களில் பணிபுரிவதாகவும், அவர்களுக்குப் பணியிடப் பாதுகாப்பு மற்றும் சமூகப் பாதுகாப்பு உறுதி செய்யப்பட வேண்டிய அவசியம் இருப்பதாகவும் அவர் குறிப்பிட்டார்.

இந்தத் தொழிலாளர்களுக்கான பாதுகாப்பு ஏற்பாடுகளை உருவாக்கும் நோக்கில் தெலங்கானா அரசு சட்டத்தை நிறைவேற்றியுள்ளதாகவும் தெரிவித்தார்.

நாட்டின் பல்வேறு மாநில அரசுகள் கிக் தொழிலாளர்களின் நலன் குறித்து தொடர்ந்து பேசி வந்தாலும், அவர்களுக்கான பாதுகாப்பு நடவடிக்கைகளைச் சட்டரீதியாக நடைமுறைப்படுத்துவதில் போதிய முன்னேற்றம் இல்லை என அவர் விமர்சித்தார்.

இந்தச் சூழலில், தெலங்கானா சட்டமன்றத்தில் நிறைவேற்றப்பட்டுள்ள சட்டத்தை ராகுல் காந்தி தொடங்கி வைப்பதுடன், கிக் தொழிலாளர்களிடையே உரையாற்ற உள்ளதாகவும் கிரண் குமார் சாமலா தெரிவித்தார்.

Hindusthan Samachar / LOGESHWARI V