புதுடெல்லி, 15 நவம்பர் (ஹி.ச.)

இந்தியாவின் முன்னணி டிஜிட்டல் பணப்பரிவர்த்தனை நிறுவனங்களில் ஒன்றான பேடிஎம் (Paytm), தனது டிஜிட்டல் வாலட் சேவையை மீண்டும் தொடங்குவதற்கான முக்கிய அனுமதியை ரிசர்வ் வங்கியிடமிருந்து பெற்றுள்ளது.

பேடிஎம் நிறுவனத்தின் துணை நிறுவனமான பேடிஎம் பேமெண்ட்ஸ் சர்வீசஸ் நிறுவனத்திற்கு, முன்கூட்டிய கொள்கை ரீதியான ஒப்புதலை ரிசர்வ் வங்கி வழங்கியுள்ளது.

இருப்பினும், இந்த அனுமதி இறுதியானது அல்ல என்றும், அடுத்த 6 மாதங்களுக்குள் இணையப் பாதுகாப்பு உள்ளிட்ட தொழில்நுட்பத் தணிக்கைகளை (Systems Audit) நிறைவு செய்ய வேண்டும் என்றும் ரிசர்வ் வங்கி நிபந்தனை விதித்துள்ளது.

அந்தத் தணிக்கையில் திருப்தி ஏற்பட்ட பின்னரே டிஜிட்டல் வாலட் சேவையை முழுமையாகச் செயல்படுத்துவதற்கான இறுதி அனுமதி வழங்கப்படும் எனத் தெரிவிக்கப்பட்டுள்ளது.

கடந்த காலத்தில் பேடிஎம் பேமெண்ட்ஸ் வங்கி மீது ரிசர்வ் வங்கி பல்வேறு கட்டுப்பாடுகளை விதித்திருந்த நிலையில், தற்போது அதன் துணை நிறுவனத்திற்குக் கிடைத்துள்ள இந்த முன்கூட்டிய அனுமதி அந்நிறுவனத்தின் டிஜிட்டல் பணப்பரிவர்த்தனை வர்த்தகத்தை மீண்டும் விரிவுபடுத்துவதற்கான முக்கிய முன்னேற்றமாகப் பார்க்கப்படுகிறது.

Hindusthan Samachar / VINOTH KUMAR P