குஜராத், 15 நவம்பர் (ஹி.ச.)

உத்தரப் பிரதேச சட்டமன்றத் தேர்தலில் சமாஜ்வாதி கட்சியுடன் கூட்டணி அமைத்து போட்டியிடுவதற்காக, காங்கிரஸ் கட்சி 181 தொகுதிகளைக் கேட்டுள்ள விவகாரம் அரசியல் வட்டாரத்தில் விவாதத்தை ஏற்படுத்தியுள்ளது.

காங்கிரஸ் கட்சியின் கோரிக்கைக்கு ஆதரவாகப் பேசிய உத்தரப் பிரதேச அமைச்சர் ஓம் பிரகாஷ் ராஜ்பர், தேசியக் கட்சியான காங்கிரஸ் 181 தொகுதிகளைக் கேட்பதில் என்ன தவறு இருக்கிறது என்று கேள்வி எழுப்பியுள்ளார்.

குஜராத் அம்பேத்கர் நகரில் செய்தியாளர்களிடம் பேசிய அவர், காங்கிரஸ் ஒரு தேசியக் கட்சி என்பதால் 181 தொகுதிகளைக் கேட்பது மிகவும் குறைவான கோரிக்கையே என்று குறிப்பிட்டார்.

தொடர்ந்து சமாஜ்வாதி கட்சியை விமர்சித்த அவர், வரவிருக்கும் மாநாட்டை நடத்துவதற்கு முன்பு அகிலேஷ் யாதவ் தனது ஐந்தாண்டு கால ஆட்சியில் தலித் மக்களுக்கு இழைக்கப்பட்ட அநீதிகள் குறித்து சிந்தித்துப் பார்க்க வேண்டும் என்றார்.

அகிலேஷ் யாதவ் முதலமைச்சராக இருந்த காலத்தில் தலித் மக்களுக்கு எதிரான வன்கொடுமைகள் அதிகமாக நடைபெற்றதாகக் குற்றம்சாட்டிய அவர், பதவி உயர்வுகளில் இடஒதுக்கீட்டை ரத்து செய்ததும் சமாஜ்வாதி கட்சிதான் என்று விமர்சித்தார்.

தற்போது தலித் மக்களின் வாக்குகளைப் பெறுவதற்காக சமாஜ்வாதி கட்சி முயற்சி செய்து வருகிறது. ஆனால், கடந்த காலங்களில் அந்தச் சமூகத்தினரிடம் அக்கட்சி எவ்வாறு நடந்துகொண்டது என்பதை மக்கள் மறந்துவிட மாட்டார்கள் என்றும் தெரிவித்தார்.

மேலும், தலித் தலைவர்களின் பெயர்களில் அமைக்கப்பட்டிருந்த மாவட்டங்கள் மற்றும் பல்கலைக்கழகங்களின் பெயர்களை சமாஜ்வாதி கட்சி மாற்றியதாகவும் அமைச்சர் குற்றம்சாட்டினார்.

தலித் சமூகத்தின் அடையாளங்களாக விளங்கிய தலைவர்களின் பெயர்களையே மாற்றிய கட்சி, தற்போது அந்த மக்களின் ஆதரவை நாடுவது முரண்பாடான செயலாகும் என்றும் அவர் விமர்சித்தார்.

உத்தரப் பிரதேச அரசியல் நிலவரம் குறித்துப் பேசிய ஓம் பிரகாஷ் ராஜ்பர், முஸ்லிம் மக்களின் வாக்குகள் அசாதுதீன் ஓவைசியை நோக்கியும், தலித் மக்களின் வாக்குகள் சந்திரசேகர் ஆசாத்தை நோக்கியும் நகர்ந்துள்ளதாகக் கூறினார்.

இதனால் சமாஜ்வாதி கட்சி நடத்தவுள்ள மாநாடு எதிர்பார்த்த வரவேற்பைப் பெறாது என்றும், அந்த மாநாடு தோல்வியடைவது உறுதி என்றும் அவர் விமர்சித்தார்.

Hindusthan Samachar / LOGESHWARI V