Enter your Email Address to subscribe to our newsletters

சென்னை, 18 நவம்பர் (ஹி.ச.)
தாம்பரம் மாநகர காவல் ஆணையராகப் புதிதாகப் பொறுப்பேற்றுள்ள நஜ்முல் ஹோடா, மாநகர காவல் எல்லைக்கு உட்பட்ட காவல் நிலையங்களில் நேரடியாக ஆய்வு மேற்கொண்டு வருகிறார்.
காவல் நிலையங்களின் செயல்பாடுகள், பொதுமக்களுக்கு வழங்கப்படும் சேவைகள் மற்றும் நிலுவையில் உள்ள வழக்குகளின் தற்போதைய நிலை குறித்து அறிந்து கொள்வதற்காக இந்த ஆய்வு நடைபெற்று வருகிறது.
அதன் தொடர்ச்சியாக, இன்று இரண்டாவது நாளாக தாம்பரம் மாநகர காவல் எல்லைக்கு உட்பட்ட பல்லாவரம், குரோம்பேட்டை, தாம்பரம் மற்றும் பீர்க்கன்காரணை ஆகிய காவல் நிலையங்களில் காவல் ஆணையர் நஜ்முல் ஹோடா திடீர் ஆய்வு மேற்கொண்டார்.
இந்த ஆய்வின்போது, காவல் நிலையங்களில் நீண்ட நாட்களாக நிலுவையில் இருக்கும் வழக்குகள் குறித்த விவரங்களைக் கேட்டறிந்தார்.
பொதுமக்களிடமிருந்து பெறப்படும் புகார் மனுக்கள் மீது எடுக்கப்பட்ட நடவடிக்கைகள் என்ன, அவற்றின் தற்போதைய நிலை என்ன என்பது குறித்தும் அதிகாரிகளிடம் விசாரித்தார்.
மேலும், காவல் நிலையங்களில் பராமரிக்கப்படும் பதிவேடுகள் முறையாகப் பராமரிக்கப்படுகிறதா என்பதையும் ஆய்வு செய்தார்.
கைது செய்யப்பட்ட குற்றவாளிகள் மற்றும் ரவுடிகளின் செயல்பாடுகள், அவர்களைக் கண்காணிக்கும் முறைகள் உள்ளிட்ட விவரங்களையும் காவல் அதிகாரிகளிடம் கேட்டுத் தெரிந்து கொண்டார்.
முன்னதாக, நேற்று முதல் நாளாக பள்ளிக்கரணை, மேடவாக்கம், சிட்லப்பாக்கம் மற்றும் சேலையூர் ஆகிய காவல் நிலையங்களில் நஜ்முல் ஹோடா திடீர் ஆய்வு நடத்தியிருந்தார்.
புதிதாகப் பொறுப்பேற்றுள்ள காவல் ஆணையர், அடுத்தடுத்து காவல் நிலையங்களுக்கு நேரில் சென்று ஆய்வு மேற்கொண்டு வருவது காவல்துறை வட்டாரத்தில் கவனம் பெற்றுள்ளது.
மேலும், தாம்பரம் மாநகர காவல் எல்லைக்கு உட்பட்ட பிற காவல் நிலையங்களிலும் இந்த ஆய்வு தொடர்ந்து நடைபெறும் என எதிர்பார்க்கப்படுகிறது.
Hindusthan Samachar / LOGESHWARI V