Enter your Email Address to subscribe to our newsletters

கராக்பூர், 21 நவம்பர் (ஹி.ச.)
இந்தியாவின் முதல் ஐஐடி கல்வி நிறுவனமான மேற்கு வங்கத்தின் காரக்பூர் ஐஐடி தொடங்கப்பட்டு 75 ஆண்டுகள் நிறைவடைந்ததையொட்டி நடைபெற்ற பவள விழா நிகழ்ச்சியில் பிரதமர் மோடி பங்கேற்றுப் பேசினார்.
அப்போது, கடந்த 12 ஆண்டுகளில் இந்தியா தனது சிந்தனை எல்லைகளை விரிவுபடுத்தி, நாட்டின் திறன்களை வெளிப்படுத்த முடியும் என்பதை நிரூபித்துள்ளதாகக் குறிப்பிட்டார்.
தடைகளை உடைத்து புதிய சாத்தியக்கூறுகளை உருவாக்குவதற்கான உறுதியை இந்தியா வெளிப்படுத்தியுள்ளது என்றும் தெரிவித்தார்.
மேலும், சவால்களை எதிர்கொள்வது தனது இயல்பு என்றும், சவால்களைச் சவாலாகவே எதிர்கொள்ளும் பழக்கம் தனக்கு இருப்பதாகவும் கூறினார்.
மக்கள் தங்களுக்குத் தாங்களே பல்வேறு கட்டுப்பாடுகளை விதித்துக்கொள்வதாகவும், சிந்தனையின் எல்லைகளை உடைக்கும்போதுதான் ஒரு நாட்டின் உண்மையான திறன்கள் வெளிப்படும் என்றும் தெரிவித்தார்.
கடந்த 12 ஆண்டுகளாக மத்திய அரசு வறுமை குறித்த அணுகுமுறையை மாற்றி, பல்வேறு திட்டங்கள் மூலம் ஏழை மக்களுக்கு அதிகாரமளித்து வருவதாகக் கூறிய பிரதமர், முந்தைய அரசுகள் செங்கோட்டையில் இருந்து வறுமையை ஒழிப்பதாக முழக்கமிட்டதே தவிர, அதற்கான நடவடிக்கைகளை மேற்கொள்ளவில்லை என விமர்சித்தார்.
செங்கோட்டையில் இருந்து கழிப்பறைகள் கட்டப்படும் என அறிவித்தபோது நாடாளுமன்றத்தில் சிலர் கேலி செய்ததாகவும், ஏழைத் தாய்மார்கள் மற்றும் பெண்களுக்கு கழிப்பறை வசதியின் முக்கியத்துவத்தை அவர்கள் புரிந்துகொள்ளவில்லை என்றும் குறிப்பிட்டார்.
உலக வங்கியின் அறிக்கையை மேற்கோள் காட்டிய பிரதமர் மோடி, கடந்த 12 முதல் 13 ஆண்டுகளில் இந்தியாவில் சுமார் 50 கோடி பேர் வறுமையிலிருந்து மீண்டுள்ளதாகக் கூறினார். இது சிந்தனையில் உள்ள தடைகளை உடைப்பதன் விளைவு என்றும் தெரிவித்தார்.
மாணவர்கள் நாட்டின் நலனுக்கு முதலிடம் அளிக்கும் 'நேஷன் ஃபர்ஸ்ட்' என்ற கொள்கையைப் பின்பற்ற வேண்டும் என வலியுறுத்திய அவர், அடுத்த 20 ஆண்டுகளில் வளர்ச்சியடைந்த இந்தியா என்ற இலக்கை அடைய ஐஐடி மாணவர்களும் பேராசிரியர்களும் உறுதியேற்க வேண்டும் என்றார்.
2047-ம் ஆண்டில் மாணவர்களில் பலர் தலைமைப் பொறுப்புகளில் இருப்பார்கள் என்றும், அடுத்த 20 ஆண்டுகள் அவர்களின் வாழ்க்கையில் மிகவும் பயனுள்ள காலமாக இருப்பதுடன், நாட்டின் எதிர்காலத்தையும் தீர்மானிக்கும் என்றும் தெரிவித்தார்.
இந்தியாவின் செமிகண்டக்டர் மற்றும் விண்வெளித் துறைகளின் வளர்ச்சியைச் சுட்டிக்காட்டிய பிரதமர், சுமார் 50 ஆண்டுகளுக்கு முன்பு இந்தியாவில் செமிகண்டக்டர் தயாரிக்க ஒரு நிறுவனம் முன்வந்தபோது அதற்கான வாய்ப்பு மறுக்கப்பட்டதாகக் கூறினார். ஆனால், தனது அரசு செமிகண்டக்டர் திட்டத்தை அறிவித்தபோது, இந்தியா அந்த வாய்ப்பை ஏற்கெனவே இழந்துவிட்டதாக சிலர் விமர்சித்தனர். இருப்பினும், அந்தத் திட்டத்தை முன்னெடுத்ததன் விளைவாக தற்போது இந்தியா சிப்களை ஏற்றுமதி செய்யத் தொடங்கியுள்ளது என்றார்.
விண்வெளித் துறையில் தனியார் நிறுவனங்களுக்கு அனுமதி அளிக்கப்பட்டதால் இளம் தொழில்முனைவோருக்கும் புதிய வாய்ப்புகள் உருவாகியுள்ளதாகக் குறிப்பிட்டார். ஐஐடி காரக்பூரின் முன்னாள் மாணவரும் ஸ்கைரூட் ஏரோஸ்பேஸ் நிறுவனத்தின் இணை நிறுவனருமான பவன் குமார் சந்தனாவின் முயற்சியால், இந்தியாவின் முதல் தனியார் ராக்கெட் உருவாக்கும் பணிக்கு புதிய உத்வேகம் கிடைத்துள்ளதாகவும் தெரிவித்தார்.
சுதந்திரத்திற்குப் பிறகு தொடங்கப்பட்ட ஐஐடி காரக்பூர், கடந்த 75 ஆண்டுகளாக இந்தியாவின் தொழில்துறை, உள்கட்டமைப்பு, அறிவியல் மற்றும் தொழில்நுட்ப வளர்ச்சியில் முக்கியப் பங்காற்றி வருவதாகப் பாராட்டினார். அந்நிறுவனத்தின் முன்னாள் மாணவர்கள் விண்வெளி மற்றும் அணுசக்தித் துறைகளின் வளர்ச்சிக்கும் பங்களித்துள்ளதாகக் குறிப்பிட்டார்.
மேலும், இந்தியா கடந்த 75 ஆண்டுகளில் காளை வண்டிப் பயணத்திலிருந்து புல்லட் ரயில் பயணம் வரையிலும், அஞ்சல் கடிதங்களிலிருந்து சமூக வலைதளச் செய்திப் பரிமாற்றம் வரையிலும் மிகப்பெரிய மாற்றத்தை அடைந்துள்ளதாகக் கூறினார்.
ஐஐடி காரக்பூர் தனது 100-வது ஆண்டு விழாவைக் கொண்டாடும்போது இந்தியா வளர்ச்சியடைந்த நாடாக மாறியிருக்க வேண்டும் என்ற இலக்குடன் அந்நிறுவனம் செயல்பட வேண்டும் என்றும், ஆராய்ச்சி, கண்டுபிடிப்பு மற்றும் தொழில்நுட்ப முன்னேற்றத்தின் மூலம் வளர்ச்சியடைந்த இந்தியா என்ற இலக்கை எட்டுவதில் ஐஐடி காரக்பூர் முக்கியப் பங்காற்றும் என நம்புவதாகவும்
பிரதமர் மோடி தெரிவித்தார்.
Hindusthan Samachar / VINOTH KUMAR P