Enter your Email Address to subscribe to our newsletters

திருப்பதி, 21 நவம்பர் (ஹி.ச.)
திருமலையில் வேங்கடத்துறைவர், ஸ்நபன பேரம் உள்ளிட்ட பெயர்களாலும் அழைக்கப்படும் உக்ர ஸ்ரீநிவாசமூர்த்தி மீது சூரியக் கதிர்கள் படக்கூடாது என்பது ஐதீகமாகப் பின்பற்றப்படுகிறது.
இதன் காரணமாகவே இவரது புறப்பாடு அதிகாலை நேரத்தில் நடைபெறுகிறது.
பழங்காலத்தில் ஸ்ரீதேவி, பூதேவி சமேத உக்ர ஸ்ரீநிவாசமூர்த்தியை உற்சவ மூர்த்தியாகக் கொண்டு திருமாட வீதிகளில் திருவீதி உலா நடத்தப்பட்டு வந்ததாகக் கூறப்படுகிறது.
ஆனால், ஒரு பிரம்மோற்சவத்தின்போது இவரது வீதி உலா நடைபெற்ற பின்னர் திருமலையில் எதிர்பாராத அசம்பாவிதங்கள் நிகழ்ந்ததாக ஐதீகம் நிலவுகிறது. இதையடுத்து வழக்கமான உற்சவங்களில் உக்ர ஸ்ரீநிவாசமூர்த்தியின் புறப்பாடு நிறுத்தப்பட்டதாகக் கூறப்படுகிறது.
தற்போது ஆண்டுதோறும் பாற்கடல் துவாதசி தினத்தில் மட்டுமே அதிகாலை 2.30 மணியளவில் கோயிலில் இருந்து புறப்படும் உக்ர ஸ்ரீநிவாசமூர்த்தி, காலை 3.30 மணிக்குள் மீண்டும் ஆலயத்திற்குள் எழுந்தருள்வது வழக்கமாக உள்ளது.
அதேபோல், கைசிக துவாதசி நாளிலும் சூரிய உதயத்திற்கு முன்பாக திருமாட வீதிகளில் எழுந்தருளி பக்தர்களுக்கு அருள்பாலிப்பது சிறப்பம்சமாகும்.
அந்த வகையில், இந்த ஆண்டு கைசிக துவாதசியை முன்னிட்டு அதிகாலையில் கார்த்திகை மாதத்திற்குரிய சிறப்பு திருவாபரண அலங்காரத்தில் ஸ்ரீதேவி, பூதேவி சமேத உக்ர ஸ்ரீநிவாசமூர்த்தி எழுந்தருளினார்.
திருமலையின் நான்கு மாட வீதிகளிலும் நடைபெற்ற இந்தப் புறப்பாட்டின்போது பக்தர்கள் திரண்டு நின்று சுவாமி தரிசனம் செய்தனர். பலரும் கற்பூர ஆரத்தி எடுத்து வழிபட்டனர்.
திருவீதி உலா நிறைவடைந்ததைத் தொடர்ந்து, உற்சவ மூர்த்திகள் மீண்டும் ஸ்ரீவாரி ஆலயத்திற்கு எழுந்தருளினர்.
இதையடுத்து கோயிலின் தங்க வாசல் பகுதியில் அர்ச்சகர்கள் கைசிக துவாதசி ஆஸ்தான நிகழ்ச்சியை நடத்தினர். அப்போது கைசிக துவாதசியின் மகிமையை விளக்கும் புராணம் பாராயணம் செய்யப்பட்டது.
இதன் மூலம் திருமலையில் கைசிக துவாதசி வழிபாட்டு நிகழ்ச்சிகள் பாரம்பரிய முறைப்படி நடைபெற்றன.
Hindusthan Samachar / LOGESHWARI V