மதுரை, 08 நவம்பர் (ஹி.ச.)

மதுரை மாவட்டம் மேலூர் அருகே உள்ள அழகர்கோவில் சாலையில் இரண்டு இருசக்கர வாகனங்கள் நேருக்கு நேர் மோதிக்கொண்டன.

இந்த விபத்தில் ஒரு இருசக்கர வாகனத்தில் பயணம் செய்த ஆறுமுகம் மற்றும் அவரது மகன் லோகேஷ் ஆகிய இருவரும் பலத்த காயமடைந்து சம்பவ இடத்திலேயே உயிரிழந்தனர்.

மற்றொரு இருசக்கர வாகனத்தில் வந்த நவீன் என்பவரும் இந்த விபத்தில் உயிரிழந்தார்.

மூவரும் தீபாவளி பண்டிகைக்காக இறைச்சி வாங்குவதற்காக இருசக்கர வாகனங்களில் சென்றபோது இந்த விபத்து நிகழ்ந்ததாகக் காவல்துறை தரப்பில் தெரிவிக்கப்பட்டுள்ளது.

விபத்தில் உயிரிழந்த லோகேஷ், மதுரை ஒத்தக்கடையைச் சேர்ந்தவர் என்பதும், தனியார் நிறுவனத்தில் பணியாற்றி வந்ததும் விசாரணையில் தெரியவந்துள்ளது.

மற்றொரு உயிரிழப்பான நவீன், வங்கி ஏடிஎம் மையங்களில் பணம் நிரப்பும் ஊழியராகப் பணியாற்றி வந்துள்ளார்.

இந்த விபத்து குறித்து தகவல் அறிந்த மேலூர் போலீசார் சம்பவ இடத்திற்கு விரைந்து சென்று விசாரணை மேற்கொண்டனர்.

உயிரிழந்த மூன்று பேரின் உடல்களும் மீட்கப்பட்டு பிரேதப் பரிசோதனைக்காக மேலூர் அரசு மருத்துவமனைக்கு அனுப்பி வைக்கப்பட்டுள்ளன.

மேலும், இந்த விபத்து தொடர்பாக மேலூர் போலீசார் வழக்குப் பதிவு செய்து, இருசக்கர வாகனங்கள் மோதிக்கொண்டதற்கான காரணம் குறித்து விசாரணை நடத்தி வருகின்றனர்.

தீபாவளிப் பண்டிகையை குடும்பத்தினருடன் மகிழ்ச்சியாகக் கொண்டாட வேண்டிய நாளில், ஒரே விபத்தில் தந்தை, மகன் உட்பட மூன்று பேர் உயிரிழந்த சம்பவம் உறவினர்கள் மற்றும் அப்பகுதி மக்களிடையே பெரும் சோகத்தை ஏற்படுத்தியுள்ளது.

Hindusthan Samachar / LOGESHWARI V