சென்னை, 09 நவம்பர் (ஹி.ச.)

தமிழ்நாட்டின் சட்டம்-ஒழுங்கு நிலைமை அபாயகரமான நிலைக்கு சென்று விட்டது அதிர்ச்சியளிக்கிறது. மது போதையின் தாக்கம் மற்றும் அதிகரித்து வரும் போதைப்பொருள் கடத்தல் ஆகிய காரணிகளை இனியும் தமிழக அரசால் மறுக்கவோ, மறைக்கவோ முடியாது என்று பாஜக தலைமை செய்தி தொடர்பாளர் நாராயணன் திருப்பதி தெரிவித்துள்ளார்.

இது தொடர்பாக அவர் தனது எக்ஸ் தளத்தில்,

தீபாவளி தினத்தன்று மட்டும் (நவம்பர் 8, 2026), மாநிலத்தின் பல்வேறு பகுதிகளில் நடந்த தனித்தனிச் சம்பவங்களில் ஒன்பது பேர் படுகொலை செய்யப்பட்டுள்ளனர்.

திருச்சியில் 17 வயதுடைய இரு சிறுவர்கள் வெட்டிக் கொல்லப்பட்டனர். தேனியில், மதுபோதையில் இருந்த கும்பலிடம் கேள்வி எழுப்பியதற்காக, பணியில் இருந்த காவல் உதவி ஆய்வாளர் ஒருவர் பொது இடத்தில் அடித்துக் கொல்லப்பட்டுள்ளார்.

மேலும், ஒரு இளம் பெண் கத்தியால் குத்திக் கொல்லப்பட்டுள்ளார். தகவல் தொழில்நுட்பத் துறையில் பணிபுரியும் ஒருவர் படுகொலை செய்யப்பட்டுள்ளார்.

இது தவிர, மது தொடர்பான மோதல்கள் மற்றும் ரவுடித்தனங்களால் பல வன்முறைச் சம்பவங்கள் நிகழ்ந்துள்ளன.

இவை ஏதோ தற்செயலாக நடந்த குற்றங்கள் அல்ல. பல சம்பவங்களில், மதுவே வன்முறைக்கு நேரடித் தூண்டுதலாக இருந்துள்ளது.

மது அருந்தும் போது ஏற்பட்ட தகராறில் ரவுடி ஒருவன் வெட்டிக் கொல்லப்பட்டுள்ளான். மதுபோதையில் இருக்கும் கும்பல்கள் காவல்துறையினரையே தாக்கும் சூழலும், சிறுவர்கள் கொடூரமான முறையில் படுகொலை செய்யப்படும் நிலையும், பொது இடங்களில் அரசின் கட்டுப்பாடு எந்த அளவுக்குச் பலவீனமடைந்துள்ளது என்பதைக் காட்டுகிறது.

மேலும், போதைப்பொருள் கடத்தலும் அதிகரித்திருப்பது நிலைமையை மேலும் மோசமாக்கியுள்ளது. 2026-ஆம் ஆண்டில், தவறாகப் பயன்படுத்தப்படும் மருந்து மாத்திரைகளின் (உதாரணமாக, வலி நிவாரணிகள்) பறிமுதல் அளவு முந்தைய ஆண்டை விட 12 மடங்குக்கும் மேலாக அதிகரித்துள்ளது.

போதைப்பொருள் தொடர்பான வழக்குகள் பெருமளவில் உயர்ந்துள்ள நிலையில், கடற்கரை வழிகள் உட்பட பல்வேறு இடங்களில் மெத்தாபெட்டமைன் (methamphetamine) போன்ற போதைப்பொருட்களின் பெரும் கடத்தல் முயற்சிகள் கண்டுபிடிக்கப்பட்டுளன.

செயற்கை போதைப்பொருட்கள் மற்றும் மாத்திரைகளைக் கடத்தும் மாநிலங்களுக்கு இடையேயான கும்பல்கள் பிடிபட்டாலும், கைப்பற்றப்பட்ட பொருட்களின் அளவைப் பார்க்கும்போது, இவற்றின் தேவையும் விநியோகமும் இன்னும் அதிகமாகவே இருப்பது தெளிவாகிறது.

மது எளிதாகக் கிடைப்பதும், போதைப்பொருள் கடத்தல் அதிகரித்து வருவதும், வன்முறைச் சம்பவங்கள் அடிக்கடி நடப்பதற்கும், அவை மிகவும் துணிச்சலான முறையில் அரங்கேறுவதற்கும் ஏதுவான சூழலை உருவாக்கியுள்ளன.

பண்டிகை நாட்களில் கூடுதல் பாதுகாப்பு மற்றும் கடுமையான கட்டுப்பாடுகள் இருக்க வேண்டிய நிலையில், மாறாக அந்நாட்களே அதிக ஆபத்து நிறைந்த நாட்களாக மாறியுள்ளன. மதுவால் தூண்டப்படும் வன்முறைகளைக் கட்டுப்படுத்தத் தவறியதற்கும், போதைப்பொருள் கும்பல்கள் எவ்வித அச்சமுமின்றிச் செயல்படுவதைத் தடுக்கத் தவறியதற்கும் தற்போதைய த வெ க அரசும், தமிழ்நாடு காவல்துறையுமே பொறுப்பேற்க வேண்டும்.

பல குடும்பங்கள் தங்கள் மகன்களை இழந்துள்ளன. பணியில் இருந்த காவல் அதிகாரி ஒருவர் உயிரிழந்துள்ளார்.

சாதாரண குடிமக்கள் பாதுகாப்பற்ற சூழலில் தவிக்கின்றனர். மது மற்றும் அதிகரித்து வரும் போதைப்பொருள் கடத்தலால் தூண்டப்படும் இத்தகைய வன்முறைகளை எந்த வகையிலும் நியாயப்படுத்த முடியாது. தெருக்களில் மது போதையால் ஏற்படும் வன்முறைகள் மற்றும் போதைப்பொருள் விநியோகக் கட்டமைப்பு ஆகிய இரண்டிற்கும் எதிராக, வெறும் அறிக்கைகளை மட்டும் வெளியிடாமல், உடனடியான மற்றும் வெளிப்படையான நடவடிக்கைகளை எடுப்பதன் மூலமே கடும் குற்றங்களை கட்டுப்படுத்த முடியும்.

இல்லையேல், பொறுப்பற்ற, நிர்வாகத்திறனற்ற த வெ க அரசே சட்டம்-ஒழுங்கு சீரழிய காரணம் என்பதை உறுதிப்படுத்தும் என்று குறிப்பிட்டுள்ளார்.

Hindusthan Samachar / ANANDHAN