புதுடெல்லி, 05 பிப்ரவரி (ஹி.ச.)

பிரதமர் நரேந்திர மோடி இன்று (பிரதமர் 05) சிக்கிம் முதலமைச்சர் பிரேம் சிங் தமாங் கோலேவுக்குப் பிறந்தநாள் வாழ்த்துக்களைத் தெரிவித்துள்ளார்.

பிரதமர் மோடி சமூக ஊடக தளமான எக்ஸ் தளத்தில் இன்று கூறியிருப்பதாவது,

சிக்கிம் முதலமைச்சர் திரு. பிரேம் சிங் தமாங் கோலே ஜி அவர்களுக்குப் பிறந்தநாள் வாழ்த்துக்கள். மக்களின் சேவைக்காக அவர் நீண்ட மற்றும் ஆரோக்கியமான வாழ்வைப் பெற பிரார்த்திக்கிறேன், என்று பதிவிட்டுள்ளார்.

பிரேம் சிங் தமாங்கின் பயணம் மேற்கு சிக்கிமில் உள்ள சிங்லிங்கில் தொடங்கியது. அங்கு அவர் பிப்ரவரி 5, 1968 அன்று ஒரு எளிய விவசாயக் குடும்பத்தில் பிறந்தார்.

டார்ஜிலிங் அரசு கல்லூரியில் தனது படிப்பை முடித்த பிறகு, தமாங் நகர்ப்புறத்தில் ஒரு தொழிலைத் தொடர விரும்பாமல், அதற்குப் பதிலாக ஒரு அரசுப் பள்ளி ஆசிரியராகப் பணியாற்ற தனது சொந்த ஊருக்கே திரும்பினார்.

இருப்பினும், மக்களுக்கு சேவை செய்ய வேண்டும் என்ற அவரது ஆசை வகுப்பறைக்குள் மட்டும் அடங்கிவிடவில்லை. குறைந்த வாய்ப்புகள், மோசமான உள்கட்டமைப்பு மற்றும் பொறுப்பான நிர்வாகமின்மை உள்ளிட்ட சாதாரண குடிமக்கள் எதிர்கொள்ளும் அன்றாடப் போராட்டங்களைக் கண்ட அவர், அரசியலில் தீவிரமாகப் பங்கேற்பதன் மூலம்தான் அர்த்தமுள்ள மாற்றத்தைக் கொண்டுவர முடியும் என்பதை உணர்ந்தார்.

1990-களில், தமாங் பொது வாழ்வில் நுழைந்து, அந்த நேரத்தில் மாநிலத்தின் அரசியல் களத்தில் ஆதிக்கம் செலுத்தி வந்த சிக்கிம் ஜனநாயக முன்னணி (SDF) கட்சியில் பணியாற்றத் தொடங்கினார். அவரது விடாமுயற்சியும், அடித்தட்டு மக்களுடனான வலுவான தொடர்பும் அவரை ஒரு பிரபலமான தலைவராக உருவெடுக்க உதவியது. இருப்பினும், அவரது சுதந்திரமான அணுகுமுறையும் தொலைநோக்குப் பார்வையும் கட்சித் தலைமையுடன் அவருக்கு முரண்பாடுகளை ஏற்படுத்தியதாகக் கூறப்படுகிறது.

2013-ல், அவர் SDF-லிருந்து விலகி, சிக்கிம் கிராந்திகாரி மோர்ச்சா (SKM) கட்சியைத் தொடங்கினார். அந்த நேரத்தில், ஆழமாக வேரூன்றியிருந்த அதிகார அமைப்பை எதிர்த்துப் போராட வாய்ப்பில்லாத ஒரு கிளர்ச்சியாளராகவே பலரும் அவரைக் கருதினர். ஆயினும், கோலேயின் நேர்மையும், கிராமப்புற வாக்காளர்களுடனான நேரடித் தொடர்பும் படிப்படியாக சந்தேகத்தை மாற்றி, வளர்ந்து வரும் ஆதரவாக மாறியது.

2019-ல், SKM கட்சி, மாநிலத்தில் SDF-இன் 25 ஆண்டுகால தொடர்ச்சியான ஆட்சிக்கு முற்றுப்புள்ளி வைத்தது. பிரேம் சிங் தமாங் சிக்கிமின் ஆறாவது முதலமைச்சராகப் பதவியேற்றார். பல குடியிருப்பாளர்களுக்கு, இந்த மாற்றம் மாநில அரசியலில் ஒரு புதிய அத்தியாயத்தின் தொடக்கத்தைக் குறித்தது.

2019 ஆம் ஆண்டு SKM கட்சிக்கு ஒரு திருப்புமுனையாகக் கருதப்பட்டால், 2024 ஆம் ஆண்டு அதைவிட ஒரு பெரிய வெற்றியாக அமைந்தது.

மக்கள் நம்பிக்கை மற்றும் ஆதரவின் அலை மீது சவாரி செய்த SKM கட்சி, சிக்கிம் சட்டமன்றத் தேர்தலில் 32 இடங்களில் 31 இடங்களைப் பெற்று, ஒரு மகத்தான வெற்றியைப் பெற்றது குறிப்பிடத்தக்கது.

Hindusthan Samachar / vidya.b